APM ၊ ဧပြီ ၃၀ / ၂၀၂၄
မင်းပြားမာ ဒေနိ(ဧပြီ ၃၀ ရက်နိ)မိုးထက အကြမ်း ဖက်စစ်ကောင်စီ၏ ဂျက်ဖိုက်တာနန့်ဗုံးကြဲတိုက် ခိုက်မှု၊ လက်နက်ကြီးနန့်ယမ်းကားပစ်ခတ်မှုတိကြောင့် အပြစ်မဲ့ပြည်သူ ၁၀ ယောက် ဒဏ်ရာရလားရေလို့ သိရပါရေ။
ဒဏ်ရာရလားလူတိမာ မင်းပြားမြို့၊ဈီးဟောင်းပိုင်းရပ်ကွက်က ဒေါ်လှလှအေး(၅၅ နှစ်)၊ဥက္ကာပျံရပ် ကွက်က ဦးသိန်းထွန်း(၃၂ နှစ်)၊သပြေညိုရပ်ကွက်က ဒေါ်သိန်းနုခိုင် (၅၃ နှစ်)၊ဒေါ်စန္ဒာဝင်း (၂၇ နှစ်)၊ မသန်းဦးနွယ် (၁၉ နှစ်)၊ ဒေါ်သန်းသန်းနု (၃၈ နှစ်)၊ ဒေါ်လှညွန့်ကြည် (၅၃ နှစ်)၊ဦးမောင်ထွန်းသိန်း (၅၆ နှစ်)၊အိမ်ရှိမင်းရွာက ဦးမောင်ရွှီ (၅၁ နှစ်)နန့် မောင် သန်းမောင်စိုး(၁၅ နှစ်)ရို့ဖြစ်ကတ်ပါရေ။
အကြမ်းဖက်စစ်ကောင်စီစွာ ဒေနိ၊ မိုးထ ၁၀ နာရီလောက်မာ မင်းပြားမြို့ကို ဂျက်ဖိုက်တာတစီးနန့် ရည်ရွယ်ချက်ဟိဟိ ဗုံးကြဲတိုက်ခိုက်ခပါရေ။
ယင်း ဗုံးသီးတိစွာ မင်းပြားမြို့၊ ဈီးဟောင်းပိုင်းရပ်ကွက်မာ ကျရောက်ပေါက်ကွဲခပြီးကေ ယင်းအနားမာဟိရေ ဒေါ်လှလှအေးနန့် ဥက္ကာပျံရပ်ကွက်က ဦးသိန်းထွန်းရို့ဒဏ်ရာ ရလားရေပိုင်၊ ဈီးဟောင်းပိုင်းရပ်ကွက်က ဒေါ်လှလှအေး၊ဦးထွန်းဝင်းနန့် ဦးထွန်းမောင်သိန်းရို့၏ နီအိမ်တိမာလည်း လုံးဝပျက်စီးလားခရပါရေ။
ယင်း မင်းပြားမြို့ကိုပင် ဒေနိ မိုးထ ၁၀ နာရီ၊ ၃၂ မိနစ်လောက်ကလည်း အကြမ်းဖက်စစ်ကောင်စွာ စစ်တွေမြို့ကနီ လက်နက်ကြီးတိနန့်ပစ်ခတ်တိုက် ခိုက်ခရေလို့ သိရပါရေ။
ယင်းလက်နက်ကြီးကျည်တိစွာလည်း မင်းပြားမြို့၊ သပြေညိုရပ်ကွက်နန့် သမင်ခြီရာရွာရို့မာ ကျရောက်ပေါက်ကွဲခပြီးကေ သပြေညို့ရပ်ကွက်က ဒေါ်သိန်းနုခိုင်၊ ဒေါ်စန္ဒာဝင်း၊ မသန်းဦးနွယ်၊ ဒေါ်သန်းသန်းနု၊ဒေါ်လှထွန်းကြည်နန့် ဦးမောင်ထွန်းသိန်းမာရို့မာ ကျည်စထိမှန်ဒဏ်ရာ ရလားခရေပိုင်၊ သမင်ခြီရာရွာသို့ရောက်နီကတ်တေ မင်းပြားမြို့နယ် အိမ်ရှိမင်းရွာက ဦးမောင်ရွှီမာနန့် မောင်သန်းမောင်စိုး ရို့မာလည်း ထိခိုက်ဒဏ်ရာ အသီးသီး ရလားရေလို့ ဒေသခံတိက ပြောပါရေ။
ယင်းအပြင် အဆိုပါလက်နက်ကြီးကျည်ကြောင့် သပြေညိုရပ်ကွက်ဟိ ဦးမောင်လှချေ၊ ဦးမောင်ထွန်းသိန်း၊ ဦးကြီးကြီးမောင်၊ ဒေါ်ယဉ်မဖြူနန့်ဒေါ်ပိုးပိုး ရို့အိမ်တိမာ မီးလောင်ပျက်စီးလားခကြောင်းလည်း သိဟိရပါရေ။
