
APM ၊ ဧပြီ ၂၈ / ၂၀၂၄
အမ်းမြို့နယ်မာ ဧပြီ ၂၈ ရက်နိ၊ နိခင်းက အကြမ်းဖက်စစ်ကောင်စီ ပစ်ခတ်လိုက်တေ လက်နက်ကြီးကျည်ကျရောက်ပေါက်ကွဲလို့ အပြစ်မဲ့ပြည်သူ နှစ်ယောက် ထိခိုက်ဒဏ်ရာရလားပြီးကေ နီအိမ်တဆောင် မီးလောင်ပြာကျလားရေလို့ သိရပါရေ။
ဒဏ်ရာရလားရေ လူတိမာ အမ်းမြို့နယ်၊ ကဇုကိုင်း၊ မဲလက်မောင်းအုပ်စု၊ မဲလက်မောင်းရွာက ကိုမောင်မြင့်ဇော် (၁၉ နှစ်)နန့် ဒေါ် မညွန့်ဦး ( ၅၇နှစ်)ရို့ ဖြစ်ပါရေ။
ဧပြီ ၂၈ ရက်နိ၊ နိခင်း ၁ နာရီ ၁၀ မိနစ်လောက်မာ အမ်းအခြီစိုက် အကြမ်းဖက်စစ်ကောင်စီ၏ ခမရ (၃၇၃)တပ်ရင်းက ပစ်ခတ်လိုက်တေ လက်နက်ကြီးကျည်တိစွာ မဲလက်မောင်းရွာသို့ ကျရောက်ပေါက်ကွဲခရေလို့ ရွာသားတိက ပြောပါရေ။
ယင်းလက်နက် ကြီးကျည်ကျရောက် ပေါက်ကွဲခလို့ ၎င်းရွာဟိ ကိုမောင်မြင့်ဇော်၏ ညာဖက်ပါးနန့် ညာဖက်ပက်ခုံး၊ ဒေါ် မညွန့်ဦး၏ ဘယ်ဖက်ပက်ခုံးနန့် ဂုတ်ဆစ်ရိုမာ လက်နက် ကြီးကျည်စထိမှန် ဒဏ်ရာရဟိလားရေလို့ ဆိုပါရေ။
ယင်းအပြင် ယင်းရွာဟိ ဦးခင်အောင်၏ နီအိမ်မာလည်း လက်နက်ကြီးကျည်ကျရောက်ပေါက်ကွဲခလို့ မီးလောင်ပြာကျလားရေလို့ သိရပါရေ။
အလားတူ ဒေနိ နိခင်း ၁ နာရီ မိနစ်၂၀ လောက်မာလည်း အဆိုပါတပ်ရင်းက ပစ်ခတ်လိုက်တေ လက်နက်ကြီးကျည်တလုံးစွာ မဲလက်မောင်းရွာနားက လယ်ကွင်းပြင်မာ ကျရောက်ပေါက်ကွဲခလို့ ယင်းရွာဟိ ဦးသန်းအေး၏ နွားတကောင်လည်းကျည်စထိမှန်သီဆုံးလားခရသိမ့်ကြောင်းသိဟိရပါရေ။

