
APM ၊ ဧပြီ ၂၃ / ၂၀၂၄
အကြမ်းဖက်စစ်ကောင်စီစွာ ဘင်္ဂလာဒေ့ချ်နိုင်ငံ၊ IDP CAMPက ဘင်္ဂလီတိအပါအဝင် ဘင်္ဂလီ ၄၀၀ လောက်ကို အကြမ်းဖက်သင်တန်းပီးဖို့ ဧပြီ ၅ ရက်နိကစလို့ အသုတ်လိုက်ခေါ်ယူပြီးကေ မောင်တောမြို့၊မြို့သူကြီးအခြီစိုက် အကြမ်းဖက်စစ်ကောင်စီ ၏ နခခ(၅) တပ်စခန်းမာ စုဆောင်းထားရေလို့ သိရပါရေ။
ယင်းပိုင် အကြမ်းဖက်စစ်ကောင်စီ စုဆောင်းထားရေ အထဲမာ ဘင်္ဂလာဒေ့ချ်နိုင်ငံ၊ IDP CAMP တိထဲက ဘင်္ဂလီ ၃၀၀ လောက်ပါဝင်ပြီးကေ ကျန်ရေ ၁၀၀လောက်စွာ မောင်တော၊ ဘူးသီးတောင်နန့် ရန်ကုန်၊ မန္တလေးဖက်က ဘင်္ဂလီတိလို့ ဆိုပါရေ။
ဘင်္ဂလားဒေ့ချ်IDP CAMPတိက ဘင်္ဂလီတိကိုတော့ ဧပြီ ၅ ရက်၊ ဧပြီ ၇ ရက်နန့် ဧပြီ ၉ ရက်ရို့မာ ဘင်္ဂလားဒေ့ချ်ဖက်ကနီ မောင်တောမြို့၊ မောင်နီရပ် ကွက်၊ အာလီရွာမြစ်ကမ်းသို့ စက်လှီနန့် အသုတ်လိုက် ခွဲပနာ ခေါ်ယူခစွာလို့ မျက်မြင်ဒေသခံတိက ပြောပါရေ။
ယင်းကတဆင့် ၎င်းရို့ကို ဘူးသီးတောင်အခြီစိုက် အကြမ်းဖက်စစ်ကောင်စီ၏ စကခ(၁၅) တပ်မက တပ်ဖွဲ့ဝင်တိစွာ ကားနန့်တင်ဆောင်ပြီးကေ မြို့သူ ကြီး နခခ (၅) တပ်ရင်းသို့ ခေါ်ယူစုဆောင်းထားရေလို့ သိဟိရပါရေ။
အကြမ်းဖက်စစ်ကောင်စီစွာ အာရက္ခတပ်တော်ကို တိုက်ခိုက်ဖို့အတွက် ကုန်ခရေ ဖေဖော်ဝါရီ ၂၈ ရက်နိကလည်း ကျောက်ဖြူမြို့၊ကျောက်တလုံးကယ်ဆယ်ရီးစခန်းက ဘင်္ဂလီ ၁၁၇ ယောက်ကို ခေါ်ပနာ ကျောက်ဖြူအခြီစိုက် ခမရ (၅၄၂) တပ်ရင်းထဲမာ အကြမ်းဖက်သင်တန်းပီးခပါသိမ့်ရေ။
ယင်းအကြမ်းဖက်သင်တန်းဆင်း ဘင်္ဂလီတိကို တော့ လက်နက်အပြည့်အစုံတပ်ဆင်ပြီးကေ ဘူးသီးတောင်၊ မောင်တောမြို့ရို့မာ ရက္ခိုင်အပါအဝင် ဘင်္ဂလီမဟုတ်တေ တခြားမျိုးနွယ်စုရို့၏ နီအိမ်တိကို မီးတိုက်စွာ၊ စာသင်ကျောင်း၊ ဆီးရုံ၊ ဆီးခန်းတိနန့် သာသနိက အဆောက်အအုံတိကို ဖျက်စီးစွာ စရေ အကြမ်းဖက်မှုတိအား ယုတ်မာကောက်ကျစ်စွာလုပ်ခိုင်းထားရေပိုင်၊ အကြမ်းဖက်သင်တန်းဆင်း ဘင်္ဂလီတိကလည်း ၎င်းရို့ကို လူမျိုးတုန်းသတ်ဖြတ်ခရေ အကြမ်းဖက် စစ်ကောင်စီအလိုကျ အကြမ်း ဖက်မှုတိကို အင်တိုက်အား တိုက်ကျူးလွန်လျက်ဟိကြောင်း ဒေသတွင်းသတင်းတိအရ သိဟိရပါရေ။
