APM ၊ ဂျုန် ၄/၂၀၂၄
မောင်တောမြို့နယ်မာ ဒေနိ(ဂျုန် ၄ ရက်နိ)မိုးထ ၁၀နာရီခွဲလောက်က စစ်ကောင်စီနန့် စစ်ကောင်စီလက်ကိုင်တုတ်မူဆလင်တိထောင်ထားရေ မိုင်းကို တက်နင်းမိလို့ မူဆလင်အမျိုးသားတယောက် ခြီထောက်တဖက် ပြတ်ထွက်လားရေလို့ သိရပါရေ။
ခြီတဖက်ပြတ်ထွက်လားလူစွာ မောင်တောမြို့နယ်၊ ညောင်ချောင်း(မူဆလင်)ရွာက ကူးနီလ်(၁၄ နှစ်) ဖြစ်ပါရေ။
ဒေနိ၊ မိုးထ ၁၀နာရီ ၃၀မိနစ်လောက်က ကူးနီလ်စွာ ညောင်ချောင်းရွာအနားဟိ လယ်ကွင်းပြင်သို့ နွားကျောင်းလားရေခါ ယင်းအနားမာ စစ်ကောင်စီနန့် ၎င်းရို့လက်ကိုင်တုတ် မူဆလင်တိ ထောင်ထားရေ မိုင်းကို တက်နင်းမိရာက ပေါက်ကွဲမှု ဖြစ်ခစွာလို့ ရွာသားတိက ပြောပါရေ။
ယင်းမိုင်းပေါက်ကွဲမှုကြောင့် ကူးနီလ်၏ ညာဖက်ခြီထောက်စွာ လုံးဝပြတ်ထွက်လားခပြီးကေ ခန္ဓာကိုယ်အနှံမာလည်း ထိခိုက်ဒဏ်ရာ ရဟိလားရေလို့ ဆိုပါရေ။
အလားတူ ဒေနိ ၁၁ နာရီခွဲလောက်ကလည်း ယင်းညောင်ချောင်းရွာ လယ်ကွင်းပြင်အနားမာ မိုင်းတလုံးထပ်မံပေါက်ကွဲခလို့ နွားတကောင် သီဆုံးလားခသိမ့်ကြောင်းလည်း သိရပါရေ။
