APM၊ ဖေဖော်ဝါရီ ၁၅/၂၀၂၄
ရမ္မာဝတီ-ရမ်းဗြဲမြို့ကို ဖက်ဆစ်အကြမ်းဖက်စစ်တပ်ဖြစ်တေ စစ်ကောင်စီတပ်က နိစဉ် ရက်ဆက် ရက်မပျက်ဘဲ တိုက်ခိုက်နီရေပိုင်၊ ဒေနိခါလည်း ဂျက်ဖိုက်တာ၊ Y-12 လီယာဉ်တိနန့် ဗုံးချပစ်ခတ်ပြီးကေ သိမ်တောင်ဘုရားကုန်း ဟိ စစ်ကောင်စီတပ်စခန်းကလည်း လက်နက်ကြီးတိနန့် အစဉ်အလာမပျက် ဆက်ပစ်နီခရေလို့ ဒေသခံတိက ပြောပါရေ။
“ရမ်းဗြဲမြို့ကို စစ်ကောင်စီစွာ ဒေနိ မိုးထ ၅နာရီကစလို့ ဂျက်ဖိုက်တာနန့်ဗုံး(၃)ကြိမ် ကြဲပါရေ။ မိုးထ ၅ နာရီခွဲကပင် ၇ နာရီခွဲထိ Y-12 ထောက်ပိုလီယာဉ်နန့် (၂၅)ကြိမ်ဗုံးသီးတိကြဲချပြီးကေ၊စက်သီနတ်နန့်(၄၅)ကြိမ်ထက်မနည်း ပစ်ပါရေ။ ယေပြီးကေ မိုးထ ၈ နာရီကစလို့ နိခင်း ၁၂နာရီထိ သိမ်တောင်ကုန်းက လက်နက်ကြီးနန့် (၁၈) ကြိမ်ပစ်ပါရေ” လို့ ရမ်းဗြဲ ဒေသခံတယောက်က ပြောပါရေ။
Y-12 ထောက်ပို့လီယာဉ်စွာ ရမ်းဗြဲမြို့ကို နိစဉ်ရက်ဆက် ဗုံးကြဲပစ်ခတ်တိုက်ခိုက်နီရေနည်းတူ သိမ်တောင်ဘုရား ကုန်းမာဟိရေ စစ်ကောင်စီတိဘားကိုလည်း ရိက္ခာထုပ်တိကို ရက်ပြတ်ချပီးနီခပါရေ။
ဒေနိမာလည်း မိုးထ ၆ နာရီခွဲကနီ ၇ နာရီခွဲထိ Y-12 ထောက်ပို့လီယာဉ်စွာ အယင်နိတိကပိုင် သိမ်တောင်ဘုရား ကုန်းမာ ဟိရေ သူရို့တပ်ဖွဲ့ဝင်တိအတွက် ရိက္ခာထုပ်တိကို (၁၀) ကြိမ်ထက်မနည်း ချပီးခရေလို့ သိရပါရေ။
ဒေနိခါအကြမ်းဖက်စစ်ကောင်စီ ကြဲချရေဗုံး၊ ပစ်ခတ်တေ လက်နက်ကြီးကျည်နန့် စက်သီနက်ကျည်တိစွာ အမှတ် (၅) ရပ်ကွက် လောင်းချောင်းရပ်၊ တောင်ဥက္ကလာရပ် အပါအဝင် ရမ်းဗြဲမြို့ထဲသို့ ကျရောက် ပေါက်ကွဲခရေလို့ သိရပါရေ။
