APM ၊ ဂျုန် ၆ /၂၀၂၄
မောင်တောမာ ဒေနိ(ဂျုန် ၆ ရက်နိ)မိုးထက စစ်ကောင်စီတပ် ထောင်းထားရေ မိုင်းကို တက်နင်းမိလို့ မူဆလင်အမျိုးသားတယောက် ခြီထောက်တဖက်ပြတ်ထွက်လားရေလို့ သိရပါရေ။
ခြီတဖက်ပြတ်ထွက်လားရေ လူစွာ မောင်တောမြို့နယ်၊ လဘော်ဇားရွာကနီ ဟာဘီအနောက်ရွာမာ စစ်ဖီးယှောင်နီရေ အဘူကာလောင်(၃၅ နှစ်) ဖြစ်ပါရေ။
အဘူကာလောင်စွာ ဒေနိ၊မိုးထ ၈နာရီ လောက်က သူစစ်ဖီးယှောင်နီရေ ဟာဘီရွာကနီ လဘော်ဇားရွာသို့ လားရောက်ရေခါ ဂေါင်ညာရွာနားအရောက်မာ စစ်ကောင်စီတပ်ထောင်ထားရေမိုင်းကို တက်နင်းမိလို့ ပေါက်ကွဲမှု ဖြစ်ပွားခစွာလို့ ဆိုပါရေ။
ယင်းပိုင်မိုင်းပေါက်ကွဲမှုကြောင့် အဘူကာလောင်၏ ဘယ်ဖက်ခြီထောက်စွာ ဒူးဆစ်အောက်ကနီ ပြတ်ထွက်လားရေလို့ သိရပါရေ။
ရက္ခိုင်မာ မြို့တိ၊တပ်စခန်းတိနန့် တပ်ရင်း/တပ်မဌာနချုပ်တိကို တခုပြီးတခု လက်လွှတ်ဆုံးယှုးနီရေ စစ်ယှုးစစ်ကောင်စီစွာ အာရက္ခတပ်တော်၏ ထိုးစစ်ဆင်တိုက်ခိုက်မှုတိကို ရင်ဆိုင်မခုဝံ့ရေခါ လူမဆန်ရေ အောက်တန်းကျနည်းလမ်းတိနန့် ပြည်သူတိနီထိုင်ရေ ရပ်ရွာတိကို လီယာဉ်တိနန့် ဗုံးကြဲချခြင်း၊ လက်နက်ကြီးပစ်ခတ်ခြင်း၊ လူလား လူလာ လမ်းတိမာ မိုင်းထောင်ခြင်းတိကို စဉ်ဆက်မပြတ် ပြုလုပ်လျက်ဟိပါရေ။
