APM၊ ဖေဖော်ဝါရီ ၇/၂၀၂၄
ဘင်္ဂလီ လက်နက်ကိုင် နှစ်ဖွဲ့ဖြစ်တေ ARA ၊ RSOရို့တိစွာ အကြမ်းဖက် စစ်ကောင်စီတပ်နန့် ပူးပေါင်းပနာ ရက္ခိုင့် တပ်တော်ကို တိုက်ခိုက်ခကြောင်း ဖေဖော်ဝါရီ ၇ ရက်နိမာ ရက္ခိုင့်တပ်တော်(AA)က ထုတ်ပြန်လိုက်ပါရေ။
ဖေဖော်ဝါရီ ၄ ရက်နိကနီ ဖေဖော်ဝါရီ ၆ ရက်အတွင်း ရက္ခိုင့်တပ်တော်၏ထိုးစစ်ကြောင့်စစ်ကောင်စီ၏ဗျူဟာ စခန်းနှစ်ခုဖြစ်တေ တောင်ပြို(လက်ဝဲ/လက်ယာ) စခန်း တိကျဆုံးခပြီးနောက် “ဖရိုဖရဲဖြစ်ပြီး ကစဉ့်ကလျား ထွက်ဗြီးနီရေ စစ်ကောင်စီတပ်ဖွဲ့ဝင်တိကို ရက္ခိုင့်တပ်တော်က လိုက်လံ ယှင်းလင်းနီချိန်အတွင်း ဘင်္ဂလီလက် နက်ကိုင်တပ်ဖွဲ့တိဖြစ်တေ ARAနန့်RSOတပ်ဖွဲ့ဝင်တိစွာ စစ်ကောင်စီတပ်ဖွဲ့ဝင်တိနန့် ပူးပေါင်းပနာ တောင်ပြို (လက်ဝဲ/လက်ယာ)စခန်းတိအတွင်းကနီ ရက္ခိုင့်တပ်တော်ကို အပြင်းအထန် ခုခံတိုက်ခိုက်ခကတ်ကြောင်း” ရက္ခိုင့်တပ်တော်၏ ထုတ်ပြန်ချက်ထဲမာ ဖော်ပြထားပါရေ။
ယေပြီးကေ တောင်ပြို (လက်ယာ) စခန်းကို ထိုးစစ်ဆင်တိုက်ခိုက်မှုမလုပ်ခင်ကတည်းကပင် တောင်ပြို (လက်ဝဲ/ လက်ယာ)စခန်းနှစ်ခုစလုံးက နယ်ခြားစောင့်တပ်မှူးတိနန့် ဘင်္ဂလီလက်နက်ကိုင်တပ်ဖွဲ့နှစ်ဖွဲ့ဖြစ်တေ ARAနန့် RSO တပ်ဖွဲ့ဝင်တိစွာ ကြိုတင်ညှိုနိူင်း၊ နားလည်မှုယူထားခပြီး ထွက်ဗြီးဖို့အခြေအနီကြုံလာပါက စစ်ကောင်စီတပ်စခန်း တိမာဟိရေ လက်နက်ခဲယမ်းတိကို တာကာငွေဆယ်သန်းနန့်ကြိုတင်ရောင်းချထားပနာ ဘင်္ဂလာဒေ့ချ်နိုင်ငံတွင်း သို့ ထွက်ဗြီးဝင်ရောက်နိုင်ဖို့အတွက် ARA အဖွဲ့ထံ အကူအညီတောင်းခံခကြောင်းကို ရက္ခိုင့်တပ်တော်က ၎င်းရို့ဖမ်း ရထားရေ စစ်သုံ့ပန်းတိ၏ ထွက်ချက်တိနန့်ကိုးကားဖော်ပြပါရေ။
ယင်းအပြင် စစ်ကောင်စီ၏နယ်ခြားစောင့်တပ်တိနန့် နိုဘီဟူဆောင်း ဂေါင်းဆောင်ရေ ARA (Arakan Rohingya Army)အဖွဲအစည်းရို့စွာ အယင်ကပင်ရင်းနှီးရေဆက်ဆံရီး၊ အပီးအယူတိနန့်တတူ နားလည်မှုဟိဟိ နီထိုင်ခကတ်ပြီး၊ရက္ခိုင့်တပ်တော်က ARA ပင်မတပ်စခန်းကို ဝင်သိမ်းခါ ARA တပ်စခန်းတိထဲကတောင်ပြို(လက်ဝဲ/လက်ယာ) ရဲမှူးတိ တာကာဆယ်သန်းနန့်ရောင်းချခရေ စစ်ကောင်စီ၏ လက်နက်ခဲယမ်းတိကို သိမ်းဆည်းရခရေအပြင် ရက္ခိုင့်တပ်တော် သိမ်းနီတုန်းမာ တောင်ပြို (လက်ဝဲ/လက်ယာ) ဗျူဟာစခန်းတိဟိလက်နက်ဂိုဒေါင်တိက ARA လုယူလားခရေလက်နက်ခဲယမ်းတိ၊ ပလတ်စတစ်လက်နက်တိ၊ WY မူးယစ်ဆီးဝါး (၆၉) ထုပ်နန့်ရီခဲ (၂၈) ထုပ်ရို့ ကိုလည်း ARA စခန်းတိအတွင်းက သိမ်းဆည်းရမိခရေလို့ ရက္ခိုင့်တပ်တော်က ဆိုပါရေ။
မြီပြင်မာလည်း ARA တပ်စခန်းစွာ နတ်မြစ်ကမ်းစပ်မာ အခိုင်အမာဆောက်ထားပနာ လမ်းတိကိုလည်း အခိုင် အခန့်ဖောက်လုပ်ထားပြီးကေ ARA ဖောက်ထားရေလမ်းစွာ တောင်ပြို (လက်ဝဲ) စခန်းနန့်ချိတ်ဆက် ထားပါ ကြောင်း၊တောင်ပြို (လက်ဝဲ) စခန်းနန့် ARA ၏ အဓိကစခန်းစွာ အဖြောင့်တိုင်းပါက မီတာ (၁၀၀၀) တစ်ထောင်ကျော်ရာ ဝီးပါကြောင်း၊ ဒေပိုင်အကွာအဝီးမာ ယင်းပိုင်အခိုင်အမာစခန်းတခုဟိနီစွာကိုက နယ်ခြား စောင့်တပ်ဖွဲ့နန့် ARA အဖွဲ့ကြား အပီးအယူနန့်နားလည်မှုတိ ဇာအတိုင်းအတာဟိရေဆိုစွာ တွက်ဆနိုင်ပါကြောင်း၊ ယင်းအပြင် ARA စခန်း၏ တဖက် ကမ်းမာဟိရေ ဘင်္ဂလာဒေ့ချ် နိုင်ငံအတွင်းသို့ ပုံမှန်ဝင်ထွက်လားလာနီရေ လက္ခဏာတိကိုလည်း အထင်အရှားတွိရကြောင်း၊ ARA အဓိကစခန်း၏တဖက်ကမ်းမာ ဘင်္ဂလာဒေ့ချ်နယ်ခြား စောင့်တပ် BGB (Border Guard Bangladesh)တပ်စခန်းတခုလည်း ဟိပါကြောင်း ရက္ခိုင့်တပ်တော်က ထောက်ပြ ထားပါသိမ့်ရေ။
အလားတူ စစ်ကောင်စီ၏လက်နက်ဂိုဒေါင်တိထဲက လက်နက်ခဲယမ်းတချို့ကို ARA အဖွဲ့က ရယူနိုင်ခစွာရေ ယင်းအချိန်က ရန်သူ့စခန်းတိအတွင်း ၎င်းရို့ကိုယ်တိုင်တတူ ဟိနီခကတ်ပြီး၊ ရက္ခိုင့်တပ်တော် ထိုးစစ်ကို စစ် ကောင်စီ နယ်ခြားစောင့်တပ် နန့် ARAရို့ပူးပေါင်းခုခံတိုက်ခိုက်နီချိန်မာ ယင်းစခန်းထဲကလက်နက်ခဲယမ်းတိကို အချိန်တိုအတွင်း ရသမျှကို သိမ်းကျုံးယူဆောင်လားနိုင်ခစွာဖြစ် ကြောင်း၊ ARA တပ်ဖွဲ့ရေ အဆိုပါ လက်နက်ခဲ ယမ်းတိကို ဘင်္ဂလာဒေ့ချ်နိုင်ငံအတွင်းက ဝင်ရောက်ပနာ ကားတစ်စီးနန့် သယ်ယူလားခကြောင်းလည်း ဖော်ပြ ထားပါရေ။
ဘင်္ဂလာ-ရက္ခိုင်နယ်စပ်၊ မောင်တောမြို့ မြောက်ပိုင်းဟိ နယ်ခြားစောင့်တပ်စခန်းလည်းဖြစ်၊ ဗျူဟာစခန်းနှစ်ခု လည်းဖြစ်တေတောင်ပြို(လက်ဝဲ/လက်ယာ)ဗျူဟာစခန်းတိကို ရက္ခိုင့်တပ်တော်က၂၀၂၄ ခုနှစ်၊ဖေဖော်ဝါရီ ၄ ရက်နိ၊မိုးထ ၅ နာရီ ၁၀ မိနစ်မာ စတင် ထိုးစစ်ဆင်တိုက်ခိုက်ခရာ ယင်းနိ၊ ညဇာ ၆ နာရီခန့်မာ တောင်ပြို (လက်ယာ) ဗျူဟာစခန်း တခုလုံးကို ရက္ခိုင့်တပ်တော်က အပြီးသတ် သိမ်းပိုက်ခပြီးနောက် တောင်ပြို(လက်ဝဲ)ကိုဖေဖော်ဝါရီ ၆ ရက်နိ၊ ညဇာပိုင်းမာ ရက္ခိုင့်တပ်တော်က အပြီးသတ် သိမ်းပိုက် ရယူနိုင်ခပါရေ။
ယင်းဗျူဟာစခန်းသိမ်းတိုက်ပွဲအတွင်း စစ်ကောင်စီ နယ် ခြားစောင့် တပ်ဖွဲ့ဝင်တိ၏ အလောင်းအမြောက်အမြား ၊ARA နန့် RSOတပ်ဖွဲ့ဝင်တိ၏အလောင်းတချို့အပါအဝင် ရန်သူ့ လက်နက်ခဲယမ်း အမြောက်အမြားကို သိမ်းဆည်း ရမိခပါရေ။
ရက္ခိုင့်တပ်တော် ထိုးစစ်ဆင်တိုက်ခိုက်မှုကြောင့် တောင်ပြို (လက်ဝဲ/လက်ယာ) ဗျူဟာစခန်း နှစ်ခုစလုံးက စစ် ကောင်စီ တပ်ဖွဲ့ဝင်တိနန့် နယ်ခြားစောင့်တပ်ဖွဲ့ဝင် ၂၀၀ ကျော်ရို့စွာ ဘင်္ဂလာဒေ့ချ်-ရက္ခိုင်နယ်စပ်ဟိ နယ်ခြားမြစ် ဖြစ်တေ“နတ်မြစ်”ကို ကျော်ဖြတ်ပြီး မောင်တောဖက်ခြမ်းက ဘင်္ဂလာဒေ့ချ်နယ်စပ်ဖက်အခြမ်းသို့ လက်နက်တိ နန့် ထွက်ဗြီး လွတ်မြောက်လားခရေလို့လည်း ဖော်ပြထားပါရေ။
ယင်းအပြင် ရက္ခိုင့်တပ်တော်က ၎င်းရို့ဖမ်းဆီးရမိထားရေ သုံ့ပန်းတိကို ဆက်လက်စစ်ဆီးလျက်ဟိပြီး ထပ်မံသိရ ရေ အချက်အလက်တိကို ဆက်လက် ဖော်ပြပီးလားဖို့ ဖြစ်တေပိုင်၊ တပြိုင်နက်တည်းမာ ဘင်္ဂလာ-ရက္ခိုင် နယ် စပ်ဟိ လူ့အဖွဲ့အစည်းတခုလုံး ငြိမ်းချမ်းတည်ငြိမ်ရီး၊ လုံခြုံရီးနန့် လူမှုသဟဇာတ ဖြစ်ရီးအတွက် အဓိကအထူး အလေးထားဆောင်ရွက်နီပနာ လုံခြုံရီးဆိုင်ရာ အစီအမံတိကိုလည်း အာရက္ခပြည်သူ့အစိုးရအနီနန့် အထူးဂရုပြု ဆောင်ရွက်လားဖို့ ဖြစ်ပါကြောင်း ရက္ခိုင့်တပ်တော်၏ ထုတ်ပြန်ချက်ထဲမာ ထည့်သွင်း ဖော်ပြထားပါရေ။
