ဒေသခံတိက ဓာတုအဆိပ်ငွိဗုံးကြဲချကြောင်း ဆို
APM၊ ဖေဖော်ဝါရီ ၇/၂၀၂၄
ဒေနိ(ဖေဖော်ဝါရီ ၇ရက်နိ)မာလည်းရမ်းဗြဲမြို့ကို အကြမ်းဖက် စစ်ကောင်စီစွာ ဂျက်ဖိုက်တာနန့် လာရောက် ဗုံးကြဲ တိုက်ခိုက်ခပြီးကေ၊ တန်းချောင်းဝမာ တန့်ထားရေ နေဗီစစ်သင်္ဘောကလည်း လက်နက် ကြီးတိနန့် ရမ်းဗြဲမြို့ကို လှမ်းပစ်ခပိုင်၊ သိမ်တောင်ဘုရားကုန်းဟိစစ်ကောင်စီတပ်စခန်းကလည်း လက်နက် ကြီးတိနန့် မြို့ထဲသို့ လှမ်းပစ်ခရေလို့ ဒေသခံတိက ပြောပါရေ။
“ဒေနိ နိခင်း ၁ နာရီ ၂၈ မိနစ်ကနီ ၁နာရီ ၄၅ မိနစ်အထိ (၅) ကြိမ်ထက်မနည်း ဂျက်ဖိုက်တာနန့်ဗုံးလာကြဲပါရေ။ နိခင်း ၂ နာရီ ၆ မိနစ်ကစလို့ ၂နာရီ ၄၈ မိနစ်အထိ နေဗီက လက်နက်ကြီး(၅)ကြိမ်ပစ်ပါရေ။ မိုးထ ၉ နာရီ ၁၃ မိနစ်ကပင် ညဇာ ၅ နာရီ ၄၀ မိနစ်အထိ သိမ်တောင်ဘုရားကုန်းကခွီးတိ လက်နက်ကြီးနန့် တရက်လုံးပစ်နီခပါရေ။ အေနိ ထူးခြားချက်က ဂျက်ဖိုက်တာနန့် ကြဲချရေ ဗုံးတိစွာ အယင်တခေါက်လာကြဲရေ ဓာတုအဆိပ်ငွိဗုံးတိဖြစ်ပါရေ။ သက်သီ အထောက်အထားတိယူထားသင့်ပါရေ။ ကျနော်ရို့က မြို့နန့်စကေ လှမ်းခါ မြင်ရာ မြင်လိုက်ရပါရေ”လို့ ရမ်းဗြဲ ဒေသခံတယောက်က ပြောပါရေ။
ဒေနိစစ်ကောင်စီ လီကြောင်းတိုက်ခိုက်မှု၊ လက်နက် ကြီးပစ်ခတ်တိုက်ခိုက်မှုကြောင့် ရမ်းဗြဲမြို့ အမှတ် (၆)ရပ် ကွက်၊ ပုလုတ်တောင်အရပ်သို့ ကျရောက် ပေါက်ကွဲခရေပိုင် ရမ်းဗြဲမြို့အနားတဝိုက်သို့ ကျရောက် ပေါက်ကွဲခရေလို့လည်း ဒေသခံတိက ပြောပါရေ။
