APM၊နိုဗမ်ဘာ ၂၆ /၂၀၂၃
ပုဏ္ဏားကျွန်းမြို့နယ်မာ ဒေနိ(နိုဗမ်ဘာ ၂၆ ရက်နိ) မွန်းလွဲ ၂ နာရီလောက်က စစ်ကောင်စီတပ်က တိုက်ခိုက်ရီးဒရုန်းနန့် ဗုံးကြဲတိုက်ခိုက်ခလို့ ပုဏ္ဏားကျွန်းမြို့နယ်၊ ခမောင်းတောရွာနန့် ရဲရိုးပြင်ရွာရို့မာ ကျရောက်ပေါက်ကွဲပနာ အမျိုးသားတယောက်နန့်အမျိုးသမီး တယောက် ပြင်းထန်ဒဏ်ရာရလားကြောင်း သိရပါရေ။
ဒဏ်ရာရလားခရေလူတိကတော့ ပုဏ္ဏားကျွန်းမြို့နယ်၊ ခမောင်းတောရွာက ဒေါ်မဝင်းချေ (၃၈ နှစ်)နန့် ရဲရိုးပြင်ရွာက ဦးစိန်သာထွန်း (၆၂ နှစ်)ရို့ ဖြစ်ကတ်ပါရေ။
ဒေနိမွန်းလွဲ ၂ နာရီလောက်မာ စစ်တွေမြို့နယ် စစ်ကောင်စီ၏ ရွှီမင်းဂံရီတပ်စခန်းက တိုက်ခိုက်ရီးဒရုန်း(DJI Air -2 အမျိုးအစားယူဆရ) တစင်းပျံသန်းလာပြီးကေ ရွှီမင်းဂံ ရီတပ်စခန်းက ၂.၈၅ ကီလိုမီတာအကွာဟိ ခမောင်းတောရွာကို လည်းကောင်း၊ ၁.၂၄ ကီလိုမီတာအကွာဟိ ရဲရိုးပြင်ရွာကို လည်းကောင်း ပစ်ခတ်တိုက်ခိုက်ခပါရေ။
ယင်းတိုက်ခိုက်မှုကြောင့် ခမောင်းတောရွာ လမ်းမားလားနီရေ ဒေါ် မဝင်းချေ ကို ထိမှန်ပြီးကေ သူမ၏ မျက်စိနား မာ ဒဏ်ရာပြင်းပြင်း ထန်ထန်ရလားခပါရေ။
အလားတူ စစ်ကောင်စီ၏ တိုက်ခိုက်ရီးဒရုန်းသုံး ပစ်ခတ်မှုကြောင့် ပုဏ္ဏားကျွန်းမြို့နယ် ရဲရိုးပြင်ရွာက ဦးစိန်သာထွန်းမာလည်းခြီထောက်ဒဏ်ရာ ရလားခပါရေ။
လက်ဟိမာ ပြင်းထန်ဒဏ်ရာရလားသူ ဒေါ်မဝင်းချေမာ စိုးရိမ်ရ အခြေအနီကြောင့် စစ်တွေဆီးရုံသို့ ပို့ဆောင်နီကတ်ပါရေ။
ရက္ခိုင်ပြည်မာ အကြမ်းဖက် စစ်ကောင် စီတပ်စွာ ရီတပ်စစ်သင်္ဘောတိကို အပြင်းထန်ဆုံး အသုံးပြုတိုက်ခိုက်နီရေပိုင် လီကြောင်းတိုက်ခိုက်မှုတိမာလည်း ရဟတ်ယာဉ်၊ ဂျက်တိုက်လီယာဉ်တိအပြင် တိုက်ခိုက်ရီး ဒရုန်းတိနန့်ပါ အပြစ်မဲ့ ပြည်သူတိကို ရက်ရက်စက်စက်ပြင်းပြင်းထန်ထန် တိုက်ခိုက်လာနီရေအတွက် ပြည်သူတိအနီနန့်စစ်ရီးသတိဟိပြီးကေ ဒရုန်းအန္တရာယ်ကိုပါအထူးသတိပြုယှောင်ယှားကတ်ဖို့ အရေးတကြီးလိုအပ်နီပါရေ။
