APM၊ ဖေဖော်ဝါရီ ၁၉/၂၀၂၄
၂၀၂၄ ခုနှစ်၊ ဖေဖော်ဝါရီ ၁၉ ရက်နိ၊ မိုးထ ၇ နာရီ ၃၀မိနစ်အချိန်ခန့်မာ ရန်ကုန်မြို့မှ ကျောက်ဖြူမြို့သို့ Air KBZ လီကြောင်းလိုင်းနန့် ရောက်ဟိလာပြီး ကျောက်ဖြူမြို့၊ ရမ္မာဝတီခန်းမထဲ စစ်ဆီးမှုခံယူနီသူ ရမ်းဗြဲက လူငယ်တ ယောက်ကိုအကြမ်းဖက်စစ်ကောင်စီက လက်ထိပ်ခတ်ပနာ ခလရ (၃၄)တပ်ရင်းထဲသို့ ဖမ်းဆီးခေါ်ဆောင်လားခကြောင်း ကနဦး သတင်းရဟိပါရေ။
အဖမ်းခံရရေလူစွာ ရမ်းဗြဲမြို့နယ်၊ ကုန်ဘောင်တို က်နယ်၊ကြိမ်တန်းချောင်ရွာ ဇာတိ မောင်နေဇော်မင်း (၂၃နှစ်) လို့ ကနဦး စုံစမ်းသိရပါရေ။
မောင်နေဇော်မင်းကို အကြမ်းဖက်စစ်ကောင်စီ၏ ရဲ၊ စရဖရို့က ရမ္မာဝတီခန်းမထဲ ရောက်ကတည်းကပင် လက်ထိပ်ခတ် သီးသန့်ထားပြီးကေ ညဇာ ၄ နာရီ ၃၀ မိနစ်အချိန်ခန့်မာ ကျောက်ဖြူမြို့အခြီစိုက် ခလရ(၃၄)တပ်ရင်းသို့ ကားနန့် ယူဆောင်လားခရေလို့ သိရပါရေ။
လက်ဟိမာ ဖက်ဆစ်အကြမ်းဖက်စစ်ကောင်စီစွာ ရန်ကုန်မြို့မှ ကျောက်ဖြူမြို့သို့ လီကြောင်းလိုင်းနန့် ရောက်လာရေ ခရီသည်တိကို ကျောက်ဖြူမြို့၊ ရမ္မာဝတီခန်းမထဲသို့ ခေါ်ဆောင်စစ်ဆီးလျက်ဟိပါရေ။
ယင်းအထဲမာ ဖေဖော်ဝါရီ ၁၈ ရက်နိ၊ ညဇာ ၅ နာရီခန့်က ရန်ကုန်မှကျောက်ဖြူသို့ မြန်မာ့လီကြောင်း လိုင်းနန့်ရောက်ဟိလာရေ ခရီးသည် (၆၇)ယောက်၊ ဖေဖော်ဝါရီ ၁၉ ရက်နိ၊ မိုးထ ၇ နာရီ ၃၀ မိနစ်အချိန်ခန့်က ရန်ကုန်မှ ကျောက်ဖြူသို့ Air KBZလီကြောင်းလိုင်းနန့် ရောက်ဟိလာရေ ခရီးသည် (၆၀)ခန့် နန့် ဖေဖော်ဝါရီ ၁၉ ရက်နိ၊ နိခင်း ၁ နာရီခန့်က မြန်မာ့လီကြောင်းလိုင်းနန့် ရောက်ဟိလာရေ ခရီးသည် (၃၀)ခန့်ရို့ပါဝင်ပါရေ။
ယင်းခရီးသည်တိအနက်က ကျောက်ဖြူမြို့ထဲမာ နီထိုင်ပြီးကေ အိမ်ထောင်စုစာရင်းပြနိုင်ရေ ခရီး သည်တချို့ကို ပြန်လွှတ်ပီးခပြီးကေ ကျောက်ဖြူမြို့နယ်နန့် ကျန်ရေမြို့ နယ်တိကခရီးသည်တိကိုတော့ လီယာဉ်လက်မှတ် ထပ်ဝယ်ခိုင်းပနာ ရန်ကုန်မြို့သို့ ပြန်ပို့ဖို့ စီစဉ်နီကြောင်းလည်းသိရပါရေ။
