APM၊ ဂျုန် ၁၉/၂၀၂၄
စစ်ကောင်စီတပ်က ဂျုန် ၁၃ ရက်နိကပင် မတရားဖမ်းယူလားခရေ စစ်တွေမြို့နယ်၊ အောင်တိုင်(ဒုံးပြင်)ရွာက အပြစ်မဲ့ပြည်သူ ၅ ယောက်စွာ ရက်သတ္တ တပတ်ကြာရေ ဒေဂုအချိန်ထိ မိသားစုတိနန့်အဆက်သွယ်မရလို့ သိရပါရေ။
စစ်ကောင်စီဖမ်းလာရေ လူတိကတော့ အောင်တိုင်(ဒုံးပြင်)ရွာက ဦးထွန်းဦးစိန်၊ ဦးမောင်သိန်း၊ ကိုသန်းဇော်ဦး၊ ကိုညီညီနန့် ကိုညီညီ၏ ယောက်ဖတော်စပ်သူရို့ဖြစ်ကတ်ပါရေ။
ဂျုန် ၁၃ ရက်နိက စစ်ကောင်စီတပ်ဖွဲ့ဝင်တိ အင်အားအလုံးအရင်းနန့် အောင်တိုင်ရွာထဲကိုဝင်ရောက်လာပနာ သူရို့ ၅ ယောက်ကို အကြောင်းမဲ့ဖမ်းယူလားခရေလို့ဒေသခံတိက ပြောပါရေ။
လက်ဟိမှာ သူရို့ ၅ ယောက်ကို ဖမ်းယူလားစွာရက်သတ္တ တပတ်ကြာမြင့်လာဗျာယ်ဖြစ်ပြီးကေ သတင်းအစအနလည်း မရရေအတွက် မိသားစုဝင်တိက စိုးရိမ်နီကတ်ပါရေ။
အလားတူ စစ်ကောင်စီတပ်ဖွဲ့ဝင်တိစွာကုန်ခရေ ဂျုန် ၉ ရက်နိကလည်း စစ်တွေမြို့၊ ရွှီပြည်သာရပ်ကွက်က အပြစ်မဲ့ပြည်သူ ၉ ယောက်ကို မတရားဖမ်းယူလားခပါသိမ့်ရေ။
