APM ၊ ဂျုန် ၁၆ / ၂၀၂၄
တောင်ကုတ်မြို့နယ်မာ ဂျုန် ၁၅ ရက်နိ၊ နိခင်းပိုင်းအချိန် စစ်ကောင်စီ၏ Y-12 စစ်ထောက်ပို့လီယာဉ်က ဗုံးကြဲပစ်ခတ်ခလို့ အရပ်သားပြည်သူတယောက် သီဆုံးလားရေလို့ သိရပါရေ။
သီဆုံးလားရေလူစွာ တောင်ကုတ်မြို့နယ်၊ ဝက်ကျိတ်အုပ်စု၊ ရွာသစ်ကယ်ရွာက ကိုအောင်လှိုင်ဝင်း(၁၇ နှစ်)ဖြစ်ပါရေ။
ဂျုန် ၁၅ ရက်နိ၊ နိခင်း ၁၂ နာရီခွဲလောက်ကစပြီးကေ စစ်ကောင်စီ၏ Y-12 ထောက်ပို့လီယာဉ်တစီးစွာ ဝက်ကျိတ်ရွာနန့် အပါးဟပ်စပ်နီရာတိသို့ ဗုံး (၃၇) လုံး လာ ကြဲခရေလို့ ရွာသားတိက ပြောပါရေ။
ယင်းအထဲက ဗုံးသီး တလုံးစွာ ရွာသစ်ကယ်ရွာထဲသို့ ကျရောက်ပေါက်ကွဲခပြီးကေ အနားမာဟိရေ ကိုအောင်လှိုင်ဝင်း၏ ဝမ်းမာ ဗုံးစဖောက်ဝင်ဒဏ်ရာ ပြင်းပြင်းထန်ထန်ရလားပနာ ဆီးကုသမှုခံယူနီယင်း ဒေနိ (ဂျုန် ၁၆ ရက်နိ) မိုးထ ၁၀ နာရီလောက်မာ ဆုံးပါးလားရေလို့ ဆိုပါရေ။
ယင်းအပြင် ယင်းဗုံးသီးကျရောက်ပေါက်ကွဲမှုကြောင့် ရွာသစ်ကယ်ရွာထဲက နီအိမ်အဆောက်အအုံတချို့လည်း ထိခိုက်ပျက်စီးခရရေလို့ သိဟိရပါရေ။
