APM၊ ဧပြီ ၂၂ / ၂၀၂၄
မောင်တောမြို့နယ်မာ ဧပြီ ၂၁ ရက်နိတရက်တည်းအတွင်း စစ်ကျန်ဗုံးသီးပေါက်ကွဲမှုကြောင့် အချေနှစ်ယောက်အပါအဝင် သုံးယောက်သီဆုံးလားပြီးကေ နှစ်ယောက် ဒဏ်ရာပြင်းပြင်းထန်ထန်ရလားရေလို့ သိရပါရေ။
သီဆုံးလားရေလူတိစွာ မောင်တောမြို့နယ်၊သရက်တောင်အုပ်စု၊ အဘူဂျာရွာက အပ်ဒူရော်ဟိမ်း( ၆ နှစ်)နန့် ဒေါ့လာဘီ (၇နှစ်)နန့် လေးမြို့ကေဒီရွာက မောင်ပါလူး(၁၆ နှစ်)ဖြစ်ပြီးကေ ဒဏ်ရာရလားလူတိကတော့ ခမောင်းဆိပ်ရွာက မောင်ငွေပိုင်(၁၅ နှစ်)နန့် မောင်ယင်ငီး (၁၅ နှစ်)ရို့ကတ်ဖြစ်ပါရေ။
ယင်းအထဲက အပ်ဒူရော်ဟိမ်းနန့် ဒေါ့လာဘီရို့နှစ်ယောက်စွာ ဧပြီ ၂၁ ရက်နိနိခင်းပိုင်းအချိန် ရွာနားကလယ်ကွင်းပြင်မာ မပေါက်ကွဲဘဲ ကျန်နီခရေ စစ်ကျန် ဗုံးသီးတလုံးကို ကောက်ယူပနာ ထုကဇတ်ခကတ်ရာ ပေါက်ကွဲမှုဖြစ်ခပြီးကေ ဂွင်းချင်းသီဆုံးလားစွာလို့ ရွာသားတိက ပြောပါရေ။
မောင်ပါလူး၊ မောင်ငွေပိုင်နန့် မောင်ယင်ငီးရို့ သုံးယောက်စွာလည်း ဧပြီ ၂၁ ရက်နိ မိုးထ ၁၀ နာရီလောက်မာ ခမောင်းဆိပ် ရွာကနီ လေးမြို့ကေဒီရွာသို့ လာကတ်ချိန် လမ်းမာကျနီရေလက်ပစ်ဗုံးတလုံးကို ကောက်ယူပနာ ယင်းလက်ပစ်ဗုံး၏ မောင်းခလုတ်ကို ဆွဲဖွင့်ခကတ်တေလို့ သိရပါရေ။
ယင်းပိုင်ဆွဲဖွင့်ကြည့်ရာက လက်ပစ်ဗုံးပေါက်ကွဲလားပြီးကေ မောင်ပါးလူစွာ နီရာမာပင်ဂွင်ချင်းသီဆုံးလားရေပိုင်၊ မောင်ငွေပိုင်နန့်မောင်ယင်ငီးရိုမာလည်း ခန္ဓာကိုယ်အနှံ့ ဒဏ်ရာတိပြင်းပြင်းထန်ထန်လားရပါရေ။
့
လက်ဟိမာ ဒဏ်ရာရလားရေ မောင်ငွေပိုင်နန့် မောင်ယင်ငီးရို့ကတော့ အရေးပေါ် ဆီးကုသမှုခံယူနီရရေလို့ သိရပါရေ။
