APM၊ ဖေဖော်ဝါရီ ၁၂/၂၀၂၄
ကျောက်ဖြူမြို့နယ်မာ ဒေနိ ဖေဖော်ဝါရီ ၁၂ရက်နိတရက်လုံး အကြမ်းဖက်စစ်ကောင်စီစွာ နီရာ ၄ ခုကနီပနာ ဂုံးချွိန် တိုက်နယ် နပျိုးချောင်းရွာနန့်ပတ်ဝန်းကျင် ရွာတိကို အကြိမ်ပေါင်း(၇၀)ကျော် ဝိုင်းဝန်း ဦးတည် ပစ်ခတ်ခရေလို့ ဒေသခံတိက ပြောပါရေ။
“ကျနော် ရွီလို့ရလိုက်စွာက အချိန်းပေါင်း (၇၀) ကျော်ပါရေ။ ယင်းကြားထဲမာ လွတ်လားစာနန့်ဆိုကေ ၈၀ လောက်တောင်ကျလီဖို့။ ပစ်တေနီရာတိကတော့ခါ အမှတ်(၃၂)ရဲတပ်ရင်း၊ ကျောက်ဖြူမြို့ ကျောက်တလုံးဘုရား အနားက ခမရ(၅၄၂)ဗျူဟာကုန်း၊ ဂုံးချွိန်တိုက်နယ် ချောင်းဝရွာနန့် ဂေါ်တူရွာ အကြား ပင်လင်ပြင်ထဲမာ တန့်ထား ရေ နေဗီသင်္ဘော၊ ဂုံးချွိန်တိုက်နယ် ပြိုင်းစေ့ကေရွာနားက ညောင်စိန်တောင်မာရောက်နီရေ စစ်ကောင်စီတပ်။ ယင်း ၄ နီရာ ကဝိုင်းလို့ ပစ်ကတ်တေ” လို့ ကျောက်ဖြူဒေသခံက ပြောပါရေ။
ယင်းအပြင် ဒေနိညဇာ ၇ နာရီအချိန်ထိလည်း စစ်ကောင်စီ၏ ခမရ (၅၄၂) တပ်ရင်းဗျူဟာကုန်းနန့် ညောင်စိန်ရွာ နားကနီ လက်နက်ကြီးတိနန့် အဆက်မပြတ်ယမ်းကား ပစ်ခတ်တိုက်ခိုက်နီတုန်းလို့ သိရပါရေ။
ယင်းပိုင် ဝိုင်းဝန်းယမ်းကားပစ်ခတ်မှုကြောင့် ဂုံးချွိန်တိုက်နယ်၊ ကုလာဘာရွာ ပတ်ဝန်းကျင်၊ နပျိုးချောင်းရွာအနား တဝိုက်အပြင် တခြားရွာနားတိကိုလည်းကျရောက်ပေါက်ကွဲခရေလို့ သိရကေလေ့ ထိခိုက်၊ ပျက်စီးမှု ဟိမဟိ ဆက်လို့ စုံစမ်းနီပါရေ။
