APM၊ ဖေဖော်ဝါရီ ၁၅/၂၀၂၄
ရက္ခိုင်ပြည်၊ ကျောက်ဖြူမြို့နယ်၊ ဂုံးချွိန်တိုက်နယ်၊ နပျိုးချောင်းရွာနန့်အနားတဝိုက်ကို တိုက်ပွဲဖြစ်ပွားခြင်းလုံးဝမဟိပါဘဲ အကြမ်းဖက်စစ်ကောင်စီက ဖေဖော်ဝါရီ၁၄ ရက် နိ တရက်အတွင်းမာ လက်နက် ကြီးနန့်အကြိမ်(၆၀) ကျော် ပစ်ခတ်တိုက်ခိုက်ခရေလို့ ဒေသခံတိ ပြောပါရေ။
အလားတူ ညီနောင်မဟာမိတ်(၃)ဖွဲ့ကလည်း ဖေ ဖော်ဝါရီ ၁၄ ရက်နိ ထုတ်ပြန်ခရေ ၎င်းရို့၏ စစ်သတင်းထုတ်ပြန်ချက်ထဲမာ”နိခင်း(၁၂) နာရီအချိန်မှ ညဇာ (၅) နာရီ(၂၈) မိနစ်အချိန်ထိ ရက္ခိုင်ပြည်၊ကျောက်ဖြူမြို့နယ် အခြီစိုက် “ခမရ (၅၄၂) ဗျူဟာကုန်း” နန့် “အမှတ် (၃၂) ရဲတပ်ရင်း” ရို့မှလည်း ကျောက်ဖြူမြို့နယ်၊ ဂုံးချွိန်တိုက်နယ်၊ နပျိုးချောင်းရွာနန့် အနားပတ်ဝန်းကျင်နီရာများသို့ လက်နက် ကြီးများဖြင့် အကြိမ်ပေါင်း (၆၀) ထက်မနည်း အကြမ်း ဖက် ပစ်ခတ်တိုက်ခိုက်ခသည်”လို့ ဖော်ပြထားပါရေ။
ယင်းပိုင် အကြမ်းဖက် စစ်ကောင်စီကလက်နက်ကြီး နန့်အဆက်မပြတ် ပစ်ခတ် တိုက်ခိုက်ခမှုကြောင့် လက်နက်ကြီးကျည်တိစွာ ဂုံးချွိန်တိုက်နယ်၊ နပျိုးချောင်းရွာနန့် ကုလဘာရွာ၊ အူချေထောင့်အနားသို့ ကျရောက်ပေါက်ကွဲပနာ လူနီအိမ်တချို့ ထိခိုက်ပျက်စီးခရရေလို့ သိရပါရေ။
