APM၊ ဖေဖော်ဝါရီ ၁၉/၂၀၂၄
ဖေဖော်ဝါရီ ၁၈ ရက်နိကစလို့ ရန်ကုန်မြို့မှ ကျောက် ဖြူမြို့သို့ လီယာဉ်နန့် လိုက်လာရေ ခရီးသည်တိကို ကျောက်ဖြူမြို့၊ ရမ္မာဝတီခန်းမသို့ ခေါ်ယူစစ်ဆီးနီရာ ယင်းခရီးသည်တိအထဲက အိမ်ထောင်စုစာရင်း ပြနိုင်ရေ ကျောက်ဖြူမြို့ကလူတိကို ပြန်လွှတ်ပီးလိုက်ပြီး၊ ကျန်ရေလူတိကိုရန်ကုန်သို့ပြန်ပို့ဖို့ စီစဉ်နီကြောင်း သတင်းတိ ထွက်ပေါ်နီပါရေ။
၂၀၂၄ ခုနှစ်၊ ဖေဖော်ဝါရီ ၁၈ ရက်နိ၊ ညဇာ ၅ နာရီအချိန် မြန်မာ့လီကြောင်းလိုင်း လီယာဉ်နန့် ရန်ကုန်မြို့မှ ကျောက်ဖြူမြို့သို့ လိုက်ပါလာရေ ခရီးသည် ကျား (၃၆) ယောက်၊ မ (၃၁) ယောက် စုစုပေါင်း (၆၇)ယောက်ကို ကျောက်ဖြူမြို့၊ အစိုးရရပ်ကွက်၊ ရမ္မာဝတီခန်းမသို့ခေါ်ဆောင်လားပနာ ကျောက်ဖြူမြို့တွင်းနီခရီးသည်တိကိုတော့ အုပ်ထိန်းသူက အိမ်ထောင်စုစာရင်းပြလို့ လာထုတ်ပါက ပြန်လွှတ်ပီးလိုက်ပြီးကေ ကျန်ရေနီရာတိက ခရီးသည်တိကို ဆက်လက် ထိန်းသိမ်းထားရေလို့ သိရပါရေ။
အလားတူ ၂၀၂၄ ခုနှစ်၊ ဖေဖော်ဝါရီ ၁၉ ရက်နိ၊ မိုးထ ၇ နာရီအချိန်က AIR KBZ လီကြောင်းလိုင်းနန့် ရန်ကုန်မြို့မှ ကျောက်ဖြူမြို့သို့လိုက်ပါလာရေခရီးသည်(၆၀)လောက်ကိုလည်း ကျောက်ဖြူမြို့၊ရမ္မာဝတီခန်းမသို့ ခေါ်ဆောင်လားပြီးကေ ထိန်းသိမ်းစစ်ဆီးနီရေလို့ သိရပါရေ။
ယင်းခရီးသည်တိအနက်က ကျောက်ဖြူမြို့ထဲမာ နီထိုင်ပြီးကေ အိမ်ထောင်စုစာရင်းပြနိုင်ရေ ခရီး သည်တိကို ပြန်လွှတ်ပီးလိုက်ပြီးကေ ကျောက်ဖြူမြို့နယ်နန့် ကျန်ရေမြို့ နယ်တိက ခရီးသည်တိကိုတော့ လီယာဉ်လက်မှတ် ထပ်ဝယ်ခိုင်းပနာ ရန်ကုန်မြို့သို့ ပြန်ပို့ဖို့ စီစဉ်နီကြောင်း သိရပါရေ။
