စစ်ရီးအရ အထိနာနီရေ စစ်ကောင်စီစွာ မြို့ရွာတိပြိုပျက်လားအောင် အငြိုးအတေးကြီးစွာနန့် ဖျက်သတ်နီရေလို့ ဖေဖော်ဝါရီ၂ ရက်နိ၊ညီနောင်မဟာမိတ်(၃)ဖွဲ့က ထုတ်ပြန်ပြောဆိုလိုက်ပါရေ။
ညီနောင်(၃)ဖွဲ့၏ထုတ်ပြန်ချက်မာ “စစ်ရီးအထိနာနီသည့် စစ်ကောင်စီအတွက် မြို့၊ ရပ်ရွာများအား ပြိုပျက်လားစီရန် တမင် ပစ်ခတ်တိုက်ခိုက်ခြင်းများသည် အငြိုးအတေးကြီးစွာဖြင့် ပြုလုပ်နေကျဖြစ်သော လုပ်ရပ်တခုရာ ဖြစ် သည်” လို့ ဖော်ပြထားပါရေ။
အလားတူ ရမ်းဗြဲကျွန်းမာလည်း စစ်ကောင်စီတပ်စခန်းတိစွာ ဗျူဟာမြောက် ဝန်းရံ ပိတ်ဆို့ခံထားရရေအတွက် အကြမ်းဖက်စစ်ကောင်စီက ရမ်းဗြဲမြို့ကို လီကြောင်း၊ ရီကြောင်းအပြင် လက်နက်ကြီးနန့်ပါ စုပြုံ ပစ်ခတ်ပြီးကေ ရမ်းဗြဲမြို့ကို ရည်ရွယ်ချက်ဟိဟိ ဖျက်ဆီးတိုက်ခိုက်နီရေလို့ ဆိုထားပါရေ။
ယင်းအပြင် အကြမ်းဖက် စစ်ကောင်စီစွာ ဒေနိခါလည်း ရမ်းဗြဲမြို့ကိုတမင် တကာပြိုပျက်စီဖို့ရည်ရွယ်ချက်ဟိဟိ ဂျက်ဖိုက်တာနန့်(၂)ကြိမ်၊Mi-35 ရဟတ်ယာဉ်နန့် (၄)ကြိမ် တိုင်တိုင် လာရောက်ဗုံးကြဲတိုက်ခိုက်ခရေအပြင် တပြိုင် နက်တည်းမာ တန်းချောင်းဝဟိ စစ်ကောင်စီနေဗီသင်္ဘောကလည်း မြို့နန့် အနားဝန်းကျင်နီရာတိသို့ လက်နက်ကြီးတိနန့်(၁၀)ကြိမ်ထက်မနည်း အဆက် မပြတ်ပစ်ခတ်တိုက် ခိုက်ခရေလို့ ညီနောင်မဟာမိတ်(၃)ဖွဲ့၏ထုတ်ပြန်ချက်မာ ဖော်ပြထားပါရေ။
