APM ၊ ဂျန်နဝါရီ ၁ / ၂၀၂၄
၂၀၂၃ ခုနှစ်၊ ဒီဇမ်ဘာ ၃၁ ရက်နိ မိုးထမာ အကြမ်းဖက်စစ်ကောင်စီတပ်က လက်နက်ချေနန့် ရည်ရွယ်ချက်ဟိဟိ ပစ်ခတ်မှုကြောင့် ရမ်းဗြဲမြို့ခံတယောက်ဒဏ်ရာရလားရေလို့သိရပါရေ။
ဒဏ်ရာရလားလူမာ ရမ်းဗြဲမြို့၊ အမှတ် (၂)ရပ်ကွက်၊ အိုးဖိုစုက ဦးခင်မောင်ထွီး (၃၃) နှစ် ဖြစ်ပါရေ။
ဦးခင်မောင်ထွီးစွာ ဒီဇမ်ဘာ ၃၁ ရက်နိမိုးထ ၁၀ နာရီလောက်က အိုးဖိုစုကနီ အမှတ်(၅)ရပ်ကွက်၊ တောင်ဥက္ကလာသို့ နွားရှာလားချိန် သိမ်တောင်ဘုရားကုန်းမာ အခြီပြုထားရေ အကြမ်းဖက် စစ်ကောင်စီတပ်က လက်နက်ချေနန့် လိုက်ပစ်ခကတ်စွာလို့ သိရပါရေ။
ယင်းလက်နက်ချေကျည်စွာ ဦးခင်မောင်ထွီး၏ဘယ်ဖက်ပက်ခုံးကို ချော်ကျလားခပါရေ။
ပြီးခရေ ၂၀၂၃ ခုနှစ်၊ ဒီဇမ်ဘာ ၃၀ ရက်နိ၊ နိခင်းကလည်း ယင်းသိမ်တောင်ဘုရားကုန်းဟိအကြမ်းဖက်စစ်ကောင်စီတပ်က လက်နက်ကြီးတိနန့် အဆက်မပြတ်ပစ်ပနာ မြို့ထဲသို့ဝင်ရောက်ပြီးကေ အိမ်တိကို မီးတိုက်ခကတ်လို့ အမှတ် ၅ ရပ်ကွက်၊ လောင်းချောင်းရပ်က အိမ်နှစ်ဆောင်မီးလောင်လားခပါသိမ့်ရေ။
လက်ဟိမာ စစ်ကောင်စီက ရမ်းဗြဲမြို့ကို လူအင်အား၊ လက်နက်၊ ရိက္ခာအင်အား ထပ်ဖြည့်ထားလို့ နှစ်ဖက်စစ်ရီး တင်းမာနီပနာ မြို့ခံတိလည်း ဖီးလွတ်ရာသို့ တိမ်းယှောင်နီကတ်ရကြောင်း သိဟိရပါရေ။
