APM၊ ဖေဖော်ဝါရီ ၂၁/၂၀၂၄
အကြမ်းဖက်စစ်ကောင်စီစွာ ဒေနိ ဖေဖော်ဝါရီ ၂၁ ရက်နိမာလည်း ရမ်းဗြဲမြို့ကို လီကြောင်းကနီ ပြင်းပြင်းထန်ထန် ဗုံးကြဲ တိုက်ခိုက်နီရေအပြင် သိမ်တောင်ဘုရားကုန်းမာဟိရေ စစ်ကောင်စီတပ်စခန်းကလည် ညည့် ၁၀ နာရီကျော် အထိလက်နက်ကြီးတိနန့် အဆက်မပြတ်တရစပ် ပစ်ခတ်နီရေလို့ သိရပါရေ။
“ဒေနိခါ စစ်ကောင်စီက ဂျက်ဖိုက်တာ ၂ စီးနန့် ရမ်းဗြဲမြို့ကို ညဇာ ၅ နာရီကနီ ၅ နာရီ ၅ မိနစ်ထိ (၂)ကြိမ်၊ ညဇာ ၅ နာရီ ၁၂ မိနစ်ကနီ ၁၆ မိနစ်ထိ (၁)ကြိမ် စုစုပေါင်း (၃) ကြိမ် ဗုံးလာကြဲပါရေ။ယေပြီးကေ ညည့် ၉ နာရီ ၂၀ မိနစ် လောက်ကပင် ညည့်၁၀ နာရီကျော်အထိ Y-12ထောက်ပို့ လီယာဉ် ၂ စီးနန့် ဗုံးချခရေပိုင် တချိန်တည်းမာ သိမ်တောင် ဘုရားကုန်းဟိ စစ်ကောင်စီတပ်စခန်းကလည်း လက်နက်ကြီးတိနန့် အဆက်မပြတ် ပစ်နီခပါရေ”လို့ ရမ်းဗြဲဒေသခံတယောက်က ပြောပါရေ။
ရမ်းဗြဲမြို့ကို ဖေဖော်ဝါရီ အစောပိုင်းကာလကစလို့ စစ်ကောင်စီစွာ နိစဉ်နိတိုင်း ဗုံးကြဲတိုက်ခိုက်နီခရေပိုင် လက် နက်ကြီးတိနန့်ပါ နိစဉ်ရက်ဆက် ပစ်ခတ်တိုက်ခိုက်နီခပါရေ။
စစ်ကောင်စီတပ်စွာ ဖေဖော်ဝါရီ ၂၀ ရက်နိကလည်း ရမ်းဗြဲမြို့ကို ဖျက်အားပြင်း ဗုံးတိသုံးပနာ ပစ်ခတ်တိုက်ခိုက် ခပြီးကေ ရမ်းဗြဲမြို့၊ အမှတ်(၃) အင်းတောင်ရပ်ကွက်ကိုလည်း ဂျက်တိုက်လီယာဉ်တစီးနန့် (၃)ကြိမ်တိတိ ဗုံး လာ ကြဲခပါသိမ့်ရေ။
ယင်းပိုင်စစ်ကောင်စီ၏လီကြောင်းတိုက်ခိုက်မှုတိကြောင့် ရမ်းဗြဲမြို့၊ အင်းတောင်ရပ်ကွက်က သီလသျှင်ကျောင်း ဆောင်တဆောင်မီးလောင် လားခရပိုင်၊ ရမ်းဗြဲမြို့မဆီးရုံ၊ မြို့မဈီးနန့် လူနီအိမ်တချို့ မီးလောင်ပျက်စီးခရေလို့ သိရပါရေ။
