APM၊ ဂျန်နဝါရီ ၂၉/၂၀၂၄
အကြမ်းဖက်စစ်ကောင်စီစွာမြောက်ဦးမြို့နန့်ရမ်းဗြဲမြို့ကို အဓိက ဦးတည်ပစ်မှတ်ထား တိုက်ခိုက်နီရေလို့ ညီနောင်မဟာမိတ်(၃)ဖွဲ့ ၏ ဂျန်နဝါရီ၂၈ ရက်နိ စစ်သတင်းထုတ်ပြန်ချက်မာ ရည်ညွှန်း ဖော်ပြထားပါရေ။
ရက္ခိုင်ဒေသအတွင်း စစ်ရေးစစ်ရာမာ လုံးဝယှဉ် ပြိုင်နိုင်စွမ်းမဟိရေ စစ်ကောင်စီစွာ မြို့၊ ရွာတိ နန့် ပြည်သူလူထုကိုရာအဓိက ဦးတည်ပစ်မှတ်ထား တိုက်ခိုက်စွာတိကို အ ယင်ကထက်မိုက်ရူးရဲဆန်စွာလုပ်လာနီရေလို့ ညီနောင်သုံးဖော်က ဆိုပါရေ။
အထူးသဖြင့် ရှေးဟောင်းအမွီအနှစ် အထွတ်အမြတ်ထား ရာ မြောက်ဦးမြို့ကို အငြိုးအတေးနန့် လက်နက်ကြီး၊ လီ ကြောင်းတိုက်ခိုက်နီစွာ၊ ရမ်းဗြဲမြို့ကို ပြိုပျက်လားအောင် လက် နက်ကြီး၊ လီကြောင်းနန့် တလိတမင် အကြမ်းဖက်တိုက်ခိုက်နီစွာတိကို ဖော်ပြ ညွှန်းဆိုထားပါရေ။
ဂျန်နဝါရီ ၂၇ ရက်နိ၊ညည့် ၁၀ နာရီဝန်းကျင်မာ မြောက်ဦးအခြီစိုက် စစ်ကောင်စီ၏“ခမရ (၃၇၇)၊ (၅၄၀) တပ် ရင်း”၊ “အမှတ် (၃၁) ရဲတပ်ရင်း”ရို့က မြောက်ဦးမြို့ကို ရည်ရွယ် ချက်ဟိဟိ လက်နက်ကြီးတိနန့်ပစ်ခတ်တိုက်ခိုက်ခပါရေ။
ယင်းပိုင် ပစ်ခတ်မှုကြောင့် အပြစ်မဲ့ ဒေသခံ အ ရပ်သား ပြည်သူ ၄ ယောက် သီဆုံးခရပြီးကေ ၇ ယော က် ထိခိုက်ဒဏ်ရာရလားခရေအပြင် မြို့ထက်ရပ် ကွက်တိက လူနီအိမ် ၂၀ ကျော်လည်း မီးလောင်ပျက်စီးခရရေလို့ ထုတ်ပြန်ချက်မာ ဖော်ပြပါရေ။
အလားတူ ရမ်းဗြဲမြို့မာလည်း ရက္ခိုင့်တပ်တော် (AA)နန့်စစ်ကောင်စီရို့ကြား မြီပြင်ထိတွိတိုက်ပွဲ ကြီးကြီးမားမားဖြစ်ပွားခြင်း မဟိပါဘဲ ရမ္မာဝတီ-ရမ်းဗြဲမြို့ကို ပြိုပျက်လားအောင် အကြမ်းဖက် စစ်ကောင်စီက လက်နက်ကြီး၊ လီကြောင်းပစ်ခတ်တိုက်ခိုက်မှုတိကို ရည်ရွယ်ချက်ဟိဟိလုပ်ဆောင်နီစွာရေ တပတ်လောက်ဟိနီယာဖြစ်ကြောင်း၊စစ်ကောင်စီစွာ လီကြောင်းက ဂျက်ဖိုက်တာတိနန့် ဓာတုအဆိပ်ငွိသုံးပနာ ကြဲချ ပစ်ခတ် တိုက်ခိုက်ရေ အထိပါ လုပ်လာနီကြောင်း၊ ယင်းအပြင် ရမ်းဗြဲမြို့ဟိ စစ်ကောင် စီတပ်စခန်းတိကလည်း လက်နက်ကြီးတိနန့် ပစ်ခတ်မှုတိကို နိစဉ်ရက်ဆက် လုပ်နီတုန်း ဖြစ်ကြောင်းကိုလည်း ညီ နောင်မဟာမိတ်(၃)ဖွဲ့၏ ထုတ်ပြန်ချက်မာ ဖော်ပြထားပါရေ။
