APM၊ ဂျန်နဝါရီ ၁ /၂၀၂၄
ဒေနိ (ဂျန်နဝါရီ ၁ ရက်နိ)၊ညဇာ ၇ နာရီခွဲအချိန်မာ မြောက်ဦးမြို့ကို နယ်ချဲ့အကြမ်းဖက် စစ်ကောင်စီတပ်က ရည် ရွယ်ချက်ဟိဟိ လက်နက်ကြီးနန့် ယမ်းကား ပစ်ခတ်လို့ မြို့ခံ အရပ်သားပြည်သူ အမျိုးသမီး ၁ ယောက်သီဆုံးလားပြီးကေ ၆ ယောက်ထက်မနည်း ဒဏ်ရာရလားခကြောင်း သိဟိရပါရေ။
သီဆုံးလားရေအမျိုးသမီးစွာ မြောက်ဦးမြို့၊ ရွှေဂူတောင်ရပ်ကွက်က ဒေါ် ဦးသိန်းနု ( ၅၀ နှစ်) ဖြစ်ပြီးကေ၊ ဒဏ်ရာရလားရေလူတိကတော့ ယင်းရွှေဂူတောင်ရပ်ကွက်က ဦး ဝင်းမြင့်အောင် ( ၅၈ နှစ်) ၊ ဦး င/ဖြူတောင် ( ၅၀ နှစ်) ၊ ဦး ဝင်းဌေး ( ၄၀နှစ်) ၊ မ ငြိမ်းဝင်း ( ၂၂ နှစ်)၊ ဒေါ် ခင်မေသိန်း(၅၄နှစ်) နန့် ကိုမင်းသိန်းစိုး ( ၁၈ နှစ်) ရို့ဖြစ်ကတ်ပါရေ။
ဒေနိ၊ ညဇာ ၇ နာရီခွဲအချိန်လောက်က မြောက်ဦးအခြီစိုက် နယ်ချဲ့ အကြမ်း ဖက် ဖက်ဆစ် စစ်ကောင်စီတပ် ခမရ (၅၄၀) တပ်ရင်းက ပစ်ခတ်လိုက်တေ လက်နက်ကြီးကျည်တလုံးစွာ ရွှေဂူတောင်ရပ်ကွက်ထဲ ကျရောက် ပေါက်ကွဲခရေလို့ မျက်မြင် ဒေသခံတိက ပြောပါရေ။
ယင်းလက်နက်ကြီးကျည် ကျရောက် ပေါက်ကွဲမှုကြောင့် ဒေါ် ဦးသိန်းနုစွာ နီရာမာပင် သီဆုံးလားခပြီးကေ၊ ဦးဝင်းမြင့်အောင် ၏ ဘယ်ဖက်တင်သား ၊ ဦးငဖြူတောင်၏ ညာဖက်ခြီထောက် ၊ ဦးဝင်းဌေး၏ ညာဖက်နားခတ်၊ မငြိမ်းဝင်း၏ ညာဖက်ပက်ခုံး၊ ဒေါ်ခင်မေသိန်း၏ပက်ခုံးနန့် ကိုမင်းသိန်းစိုး၏ ညာဖက်လိုင်ပင်းရို့မာ လက်နက်ကြီးကျည်စတိ မှန်လားခရေလို့ ဒေသခံတိက ဆိုပါရေ။
ရက္ခိုင်ပြည်မာ ရက္ခိုင့်တပ်တော်AA နန့်နယ်ချဲ့ အကြမ်း ဖက် စစ်ကောင်စီတပ်ရို့အကြား ၂၀၂၃ ခုနှစ်၊ နိုဗမ်ဘာ ၁၃ ရက်နိကစပနာ တကျော့ပြန်တိုက်ပွဲတိစတင်ဖြစ်ပွားရေနောက်ပိုင်း အယှုံးနန့်ရင်ဆိုင်နီရရေ စစ်ကောင်စီတပ်စွာ အရပ်သားပြည်သူတိနီထိုင်ရေရပ်ရွာတိကို လက် နက်ကြီး၊ လက်နက်ချေတိနန့် ရည်ရွယ် ချက်ဟိဟိ ယမ်းကား ပစ်ခတ်တိုက်ခိုက်နီရေအတွက် အပြစ်မဲ့အရပ်သားပြည်သူတိ သီဆုံး၊ ထိခိုက်ဒဏ်ရာရမှု၊ အိုးအိမ်အဆောက်အအုံ ပျက်စီးဆုံးယှုံးမှုတိစွာ တရက်ထက်တရက် ပိုလို့ များပြားလာနီပါရေ။
