APM၊ ဂျန်နဝါရီ ၂၀/၂၀၂၄
ရသေ့တောင်မြို့နယ်မာ ဂျန်နဝါရီ ၁၉ ရက်နိက တိုက်ပွဲဖြစ် ပွားခြင်းလုံးဝမဟိပါဘဲ အကြမ်းဖက် စစ်ကောင်စီတပ်က
ရသေ့တောင်မြို့နန့် မြို့နားက ရပ်ရွာတိကို လက်နက်ကြီးတိနန့် ရည်ရွယ်ချက်ဟိဟိ ပစ်ခတ်ခကြောင်း ညီနောင်(၃) ဖွဲ့ က သတင်း ထုတ်ပြန်ပါရေ။
ညီနောင်(၃)ဖွဲ့၏ ဂျန်နဝါရီ ၁၉ ရက်နိ သတင်း ထုတ်ပြန်ချက်ထဲမာ “ရက္ခိုင်ပြည်၊ ရသေ့တောင်မြို့နယ်တွင် မည်သည့်တိုက်ပွဲမှဖြစ်ပွားခြင်းမဟိဘဲ ရန်သူ့လက်ကျန်တပ် ရင်းတချို့မှအရပ်သားပြည်သူများနီထိုင်ရာရသေ့တောင် မြို့နန့်မြို့နားဟိရပ်ရွာများသို့ တလိတမင် ရည်ရွယ်ချက် ဟိဟိ လက်နက် ကြီးများဖြင့် ပစ်ခတ်ခြောက် လှန့်လျက်ဟိသည်” လို့ ထည့်သွင်း ဖော်ပြထားပါရေ။
ယင်းအပြင် ရက္ခိုင်ဒေသအတွင်းမြို့နယ်တချို့မာ ရက္ခိုင့်တပ်တော်(AA)နန့်စစ်ကောင်စီရို့အကြား တိုက်ပွဲတိ ဆက်ဟိနီရေပိုင် ရန်သူစစ်ကောင်စီက ဖုန်းလိုင်း၊ အင်တာနက်လိုင်း အစဟိရေ ဆက်သွယ်ရီးဆိုင်ရာ သတင်း အချက် အလက်တိကို ရည်ရွယ်ချက်ဟိဟိ ဖြတ်တောက်ပနာ စစ်ရာဇဝတ်မှု၊ လူ့အခွင့်အရေးချိုးဖောက်မှုတိကို အင်တိုက် အားတိုက် ကျူးလွန်ဖို့ ပြင်ဆင်နီရေ လို့လည်း ညီနောင်မဟာမိတ်(၃)ဖွဲ့၏ ထုတ်ပြန်ချက်မာ ဖော်ပြထားပါရေ။
