APM၊ ဖေဖော်ဝါရီ ၁၄/၂၀၂၄
ဒေနိ၊ ဖေဖော်ဝါရီ ၁၄ ရက်နိမာရမ်းဗြဲမြို့ကို အကြမ်းဖက်စစ်ကောင်စီ၏ ကြည်း၊ ရီ၊ လီ တိုက်ခိုက်မှုကြောင့်အမှတ် (၄)၊ (၅) ရပ် ကွက်တိကလူနီအိမ်တိ ထပ်မံမီးလောင်ပျက်စီးခရကြောင်း ဒေသခံတိက ပြောပါရေ။
ဒေနိ၊ မိုးထ ၁၀ နာရီ ၃၉ မိနစ်ကနီ နိခင်း ၁ နာရီ ၉ မိနစ်ထိ သိမ်တောင်ဘုရားကုန်းထက်ဟိ စစ်ကောင်စီတပ်စခန်းက ရမ်းဗြဲမြို့ထဲကိုလက်နက်ကြီနန့်(၁၀) ကြိမ်ပစ်ခကြောင်း၊ မိုးထ ၁၁ နာရီ ၃၃ မိနစ်ကနီ ညဇာ ၄နာရီ ၄၀မိနစ်ထိ ဂျက်ဖိုက်တာ နန့်ရမ်းဗြံမြို့ကို(၉) ကြိမ်ဗုံးကြဲခကြောင်း၊ နိခင်း ၃ နာရီ ၃၈ မိနစ်ကနီ ၃ နာရီ ၅၄ မိနစ်ထိ Mi-35 စစ်ရဟတ် ယာဉ်နန့် ရမ်းဗြဲမြို့ကို စက်သီနတ်နန့်ပစ်ခတ်ခပါကြောင်း ဒေသခံတိက ဆိုပါရေ။
ယင်းအပြင်အမှတ်(၄၁) တိုက်ခိုက်ရီးနေဗီစွာ သလူချောင်းဝ အောက်နခမ်းနားကနီလို့ ရမ်းဗြဲမြို့ကို လက်နက်ကြီးနန့် (၁၁) ကြိမ် ပစ်ခတ်ခပြီးကေ၊ ကလိန်တောင်မြစ် ပြင်ချေချောင်းဝမာ ကျောက်ချထားရေ ကမ်းထိုးဇက်နေဗီစွာ တန်းချောင်းဝနန့် တိန်ချောင်း ဝကြားကို မောင်းလာပြီးကေ ကမ်းနားတလျှောက်ကို ပွိုင့် 5 နန့် ပစ်ခတ်ခရေလို့လည်း သိရပါရေ။
ယင်းပိုင် အကြမ်းဖက် စစ်ကောင်စီက ရမ်းဗြဲမြို့ကို လူမဆန်စွာ ကြည်း၊ ရီ၊ လီ တိုက်ခိုက်မှုကြောင့် အမှတ် (၄) ရပ်ကွက် ကလေတန်း၊ အောင်စေတီ၊ ကင်းတဲ အရပ်တိက လူနီအိမ်တိ မီးဟုန်းဟုန်းတောက် လောင်ကျွမ်းခရပိုင်၊ အမှတ် (၅) ရပ်ကွက် လောင်းချောင်းနန့် တောင်ဉက္ကလာ အရပ်တိက လူနီအိမ်တချို့လည်း မီးလောင် ပျက်စီးခရရေလို့ ရမ်းဗြဲ ဒေသခံတိက ပြောကတ်ပါရေ။
