APM ၊ ဂျန်နဝါရီ ၂၇ / ၂၀၂၄
မင်းပြားမြို့နယ်မာ ဒေနိဂျန်နဝါရီ ၂၇ ရက်နိ၊ မိုးထဖက်က အကြမ်းဖက် စစ်ကောင်စီတပ် ထောင်ထားခရေ မိုင်းကို တက်နင်းမိလို့ အာရက္ခပြည်သူ လူငယ်တယောက် ပြင်းပြင်းထန်ထန် ဒဏ်ရာရလားကြောင်း သိရပါရေ။
မိုင်းနင်းမိလို့ ပြင်းထန်ဒဏ်ရာရလားခရေ လူငယ်ကတော့ မင်းပြားမြို့၊ ဥက္ကာပျံ ရပ်ကွက်က ဦးနှင်းလူချေ၏ သား မောင်အောင်ငြိမ်းချမ်း(၁၇ နှစ်) ဖြစ်ပါရေ။
မောင်အောင်ငြိမ်းချမ်းစွာ မိဖတိနန့်တတူမင်းပြားမြို့နယ်၊ အမ်းသားရွာမာ စစ်ဖီးလာယှောင်နီလူ တယောက်ဖြစ် ပါရေ။
သူစွာ ဒေနိ၊ မိုးထ ၇ နာရီကျော်လောက်မာ အမ်းသားရွာအနားဟိ ဖားပြို (ရက္ခိုင်)ရွာ သင်္ချိုင်းတောင်ကုန်းနားသို့ လားလာရေခါ ယင်းသင်္ချိုင်းတောင်ကုန်းမာ စခန်းချနီခရေ စစ်ကောင်စီတပ်က ထောင်ထားပစ်ခရေ မြီမြှုပ်မိုင်း ကိုနင်းမိရာ ညာဖက်မျက်လုံး ပွင့်ထွက်၊ ညာခြီထောက်ပိုင်းပြတ်၊ ဘယ်ခြီထောက် ဒဏ်ရာရလားခပါရေ။
လက်ဟိမာ မောင်အောင်ငြိမ်းချမ်းစွာ အရေးပေါ် ဆီးကုသမှု ခံယူနီရကြောင်း သိရပါရေ။
