အကြမ်းဖက် စစ်ကောင်စီက မင်းပြားမြို့ကို ဂျက်လီယာဥ်နန့် ဗုံးကြဲ၊ အာရက္ခပြည်သူ ၇ ယောက် ပြင်းထန်ဒဏ်ရာရပြီး အိမ် ၅ ဆောင်ထက်မနည်းမီးလောင် ပျက်စီး
APM ၊ မာ့ချ် ၂ / ၂၀၂၄
မင်းပြားမြိုကိုမာ့ချ် ၁ ရက်နိညည့်ကအကြမ်း ဖက်စစ်ကောင်စီတပ်မှ ဂျက်လီယာဥ်နန့် ဗုံးကြဲလို့ အာရက္ခပြည်သူ ၇ ယောက် ပြင်းထန်ဒဏ်ရာရလားပြီးကေ လူနီအိမ် ၅ ဆောင်ထက်မနည်း မီးလောင် ပျက်စီးလားခကြောင်း သိရပါရေ။
ဒဏ်ရာရလားခရေလူတိကတော့ မင်းပြားမြို့၊ကင်းဆိပ်ရပ်ကွက်က မငြိမ်းအေနိုင် (၁၇ နှစ်)၊ ဒေါ်သန်းသန်းမော် (၃၅နှစ်)၊ဒေါ်စောပွင့်(၆၉နှစ်)နန့်မင်းပြားမြို့၊ကံ့ကော်မြိုင်ရပ်ကွက်က ဦးကျော်သိန်းဦး(၃၃ နှစ်)၊ ဦးညီညီ(၃၆ နှစ်)၊ ဦးမဲချေ (၅၁ နှစ်)နန့် ဒေါ်မချေ(၅၇နှစ်)ရို့ဖြစ်ကတ်ပါရေ။
မာ့ချ် ၁ ရက်နိ၊ ညည့် ၁၁ နာရီ ၂၀ မိနစ်က အကြမ်းဖက်စစ်ကောင်စီတပ်မှ မင်းပြားမြိုထဲသို ရည်ရွယ်ချက်ဟိဟိ ဗုံး ၁၀ လုံးတိတိ ကြဲချတိုက်ခိုက်ခ ရေလို့ မြို့ခံတိကပြောပါရေ။
ယင်းအထဲက ဗုံးသီးတလုံး ကင်းဆိပ်ရပ်ကွက်က ဒေါ်သန်းသန်းမော် အိမ်တည့်တည့်ကို ကျရောက်ပေါက်ကွဲ ပနာ ဒေါ်သန်းသန်းမော်၏ ညာဖက်ခြီထောက် ဒူးဆစ်အောက်ပိုင်း လုံးဝ ပြတ်ထွက်လားခပြီးကေ အိမ်နားချင်းတိဖြစ်ကတ်တေ မငြိမ်းအေးနိုင်နန့် ဒေါ်စောပွင့် ရို့မြီးအဘောင်မ နှစ်ယောက်လည်း ခန္ဓာကိုယ်အနှံ ဒဏ်ရာအသီး သီးရဟိလား ရေလို့ ဆိုပါရေ။
ယင်းအပြင် နောက်ထပ်ဗုံးသီးတလုံးလည်း မင်းပြားကား ဂိတ်အဟောင်းထဲသို့ ကျရောက်ပေါက်ကွဲခပနာ ကံ့ကော်မြိုင်ရပ်ကွက်မှ ကားဂိတ်အဟောင်းမာ စစ်ဖီးလာယှောင်နီရေ ဦးမဲချေ၏ ဘယ်ဖက်မျက်လုံးဆုံးယှုးလားခပြီးကေ ဦးညီညီ၏ဂေါင်း၊ ဒေါ်မချေ၏ ဘယ်ဖက်ခြီထောက်၊ ဦးကျော်သိန်းဦး၏ မျက်နှာနန့်ခန္ဓာကိုယ်အနှံရိုမာ ဒဏ်ရာတိ အသီးသီးရဟိလားခပါရေ။
လက်ဟိမာ ဒဏ်ရာရလားခရေလူတိစွာ အရေးပေါ်ဆီးကုသမှုခံယူလိုဟိပါရေ။
ယင်းအပြင် ဗုံးသီးတိကျရောက် ပေါက် ကွဲမှုကြောင့် မင်းပြားမြို့ထဲက လူနီအိမ် ၅ ဆောင်ထက်မနည်း မီးလောင်ပျက်စီးလားခရေလို့လည်း သိဟိရပါရေ။
