တောင်ကုတ်မြို့နယ်၊ မအီဒေသက အရပ်သား ၃ယောက်ကို လူသားဒိုင်းကာအဖြစ် အကြမ်း ဖက်စစ်ကောင်စီ ဖမ်းခေါ်လား
APM၊ ဖေဖော်ဝါရီ ၁၇/၂၀၂၄
တောင်ကုတ်မြို့နယ်၊ မအီမြို့၊ ကင်းခြေရွာသစ်က အရပ်သားပြည်သူ ၃ ယောက်ကို ဖေဖော်ဝါရီ ၁၆ ရက်နိ၊ ညည့်ပိုင်းမာ တပ်ဆုတ်လားရေ အကြမ်းဖက် စစ်ကောင်စီက လူသားဒိုင်းကာအဖြစ် ဖမ်းခေါ်လားကြောင်း သိရပါရေ။
အဖမ်းခံလိုက်ရရေအပြစ်မဲ့အရပ်သားပြည်သူတိကတော့ တောင်ကုတ်မြို့နယ်၊ မအီမြို့၊ ကင်းခြေရွာသစ်မာ နီရေ ဦးမောင်သန်း၊ ကိုညီညီနန့် ဦးနိုင်လင်းအောင် ရို့ဖြစ်ကတ်ပါရေ။
တောင်ကုတ်မြို့နယ်၊ မအီမြို့အခြီချ ဇိဇံဗျူဟာကုန်းက အကြမ်းဖက် စစ်ကောင်စီတပ်ဖွဲ့ဝင်တိနန့် မအီရဲစခန်းက ရဲသားတိပူးပေါင်းအင်းအား ၈၀ လောက်စွာ ဖေဖော်ဝါရီ ၁၆ ရက်နိ ညည့် ၉နာရီ ၂၅ မိနစ်မာ မအီကနီ ကျောက်ဖြူဖက်သို့ တပ်ဆုတ်လားခကတ်ပါရေ။
ယင်းပိုင် တပ်ဆုတ်ခါ ညည့် ၁၂ နာရီ အချိန်မာ ကင်းခြေရွာသစ်သို့ ဝင်ရောက်ပြီးကေ ဦးမောင်သန်း၊ ကိုညီညီ နန့် ဦးနိုင်လင်းအောင်ရို့(၃)ယောက်ကို အတင်းအဓမ္မဖမ်းဆီး ပနာ လူသားဒိုင်းကာအဖြစ် ဖမ်းခေါ်လားခရေလို့ ဒေသခံတိက ဆိုပါရေ။
ဦးမောင်သန်း ၊ ကိုညီညီနန့်ဦးနိုင်လင်းအောင်ရို့ကို ၎င်းရို၏ မိသားစုတိက လက်ဟိအချိန်ထိ အဆက်အသွယ်မရသိမ့်လို့ သိရပါရေ။
