မင်းပြားမာ အကြမ်းဖက်စစ်ကောင်စီတပ်က ဂျက်တိုက်လီယာဉ်နန့်ဗုံးကြဲလို့ အိမ် ၄ ဆောင်ပျက်စီး
APM ၊ မာ့ချ် ၁ / ၂၀၂၄
မင်းပြားမြို့နယ်မာ ဖေဖော်ဝါရီ ၂၉ ရက်နိ၊ ညည့်အချိန် အကြမ်းဖက်စစ်ကောင်စီတပ်က ဂျက်တိုက်လီယာဉ်နန့် ဗုံးကြဲတိုက်ခိုက်လို့ အိမ် ၄ ဆောင်ပျက်စီးလားခကြောင်း သိရပါရေ။
ပျက်စီးလားခရေအိမ်တိကတော့ မင်းပြားမြို့နယ်၊ အမ်းသားရွာက ဦးခိုင်လင်းစံ၊ဒေါ်ဝင်းလှကြည်၊ဦးကျော်စိန်နန့် ဦးမောင်စိုးဝင်းရို့၏ နီအိမ်တိ ဖြစ်ကတ်ပါရေ။
ဖေဖော်ဝါရီ၂၉ရက်နိ၊ညည့် ၁၁နာရီခွဲလောက်မာ အကြမ်း ဖက်စစ်ကောင်စီ၏ ဂျက်တိုက်လီယာဉ်တစီးစွာအမ်းသားရွာထဲသို့ ရည်ရွယ်ချက်ဟိဟိ ဗုံးကြဲတိုက်ခိုက်ခ ရေလို့ ရွာ သားတိက ပြောပါရေ။
ယင်းတိုက်ခိုက်မှုကြောင့် အမ်းသားရွာက ဦးကျော်စိန်၏ နီအိမ်အလယ်ဂေါင်တည့်တည့်သို့ဗုံးသီးကျရောက်ပေါက် ကွဲခရေလို့ ဆိုပါရေ။
ယင်းဗုံးသီးကျရောက်ပေါက်ကွဲမှုကြောင့် ဦးကျော်စိန်၏ အိမ် လုံးဝပြိုပျက်လားခရေပိုင် အပါးဟပ်စပ်က ဒေါ်ဝင်းလှကြည်၊ ဦးခိုင်လင်းစံ နန့် ဦးမောင်စိုးဝင်းရို့၏ နီအိမ်တိလည်း ပြိုပျက်လားခရပြီးကေ ဦးမောင်စိုးဝင်း၏အိမ်မာဟိရေ စပါးတောင်း ၁၀၀ ပါ ပျက်စီးဆုံးယှုးလားခရေ လို့ သိရပါရေ။
ကုန်ခရေ ဖေဖော်ဝါရီ ၂၇ ရက်နိ မိုးထစောစောကလည်း အကြမ်းဖက်စစ်ကောင်စီတပ်က ဂျက်လီယာဥ်နန့်ဗုံးကြဲတိုက်ခိုက်လို့ မင်းပြားမြို့နယ်၊ သေကံရွာက အပြစ်မဲ့အ ရပ်သားပြည်သူ ၁၄ ယောက်ထက်မနည်းဒဏ်ရာရခရေအပြင်အိမ် ၁၂ဆောင်၊ စပါးကျီ ၁ လုံးနန့်စာသင်ကျောင်း ၂ ဆောင် လုံးဝပျက်စီးခပါသိမ့်ရေ။
အလားတူ ယင်းနိ ဖေဖော်ဝါရီ ၂၇ ရက်နိတရက်တည်းမာပင် မင်းပြားမြို့နယ်၊ မင်းဖူးဆီးရုံကို စစ်ကောင်စီက ရည် ရွယ်ချက်ဟိဟိ လီကြောင်းကတိုက်ခိုက်လို့ ဆီးရုံပျက်စီးလားရေပိုင် အရပ်သားပြည်သူတိ၊ကျန်းမာရီးဝန်ထမ်းတိအပြင် ဆီးကုသမှုခံယူနီရေ စစ်သုံပန်းတိနန့် ၎င်းရို့၏ မိ သားစုဝင်တိပါ ထိခိုက်ဒဏ်ရာရလားခရေလို့ သိရပါရေ။
