APM ၊ မေ ၂၂ / ၂၀၂၃
မုန်တိုင်းကြောင့် ပျက်စီးလားသည့် မြောက်ဦးမြို့နယ် တိမ်ညိုစစ်ဖီးယှောင်စခန်းတွင် လက်ဟိ စားနပ်ရိက္ခာများ၊ အမိုးအကာများ၊ ဆီးဝါးများအပါအဝင် အရေးပေါ် အကူအညီများ လိုအပ်နီကြောင်း သိရသည်။
မေ ၁၄ ရက်နိက တိုက်ခတ်ခသည့် Mocha ဆိုင်ကလုန်းမုန်တိုင်းကြောင့် တိမ်ညိုစစ်ဖီးယှောင်စခန်းဟိ နီအိမ် ၇၇၃ လုံးတွင် အိမ်ခြီ ၆၈၅ လုံးမှာ ပျက်စီးဆုံးယှုံးလားခရသည်။
လက်ဟိ အဆိုပါ နီအိမ်များပျက်စီးလားသည့် စစ်ဖီးယှောင်များမှာ ဘုန်းကြီးကျောင်း၊ စာသင်ကျောင်း၊ ဆီးရုံနန့် နီးစပ်ရာနီအိမ်များတွင် ယာယီခိုလှုနီကတ်ရပြီး စားနပ်ရိက္ခာများ၊ သောက်သုံးရီ၊ ဆီးဝါးများနန့် အသုံးဆောင် ပစ္စည်းများကအစ အခက်အခဲအကျပ်အတည်းနန့် ရင်ဆိုင်နီကတ်ရကြောင်း စစ်ဖီးယှောင်များက ပြောသည်။
ယင်းအပြင် ပျက်စီးလားသည့် နီအိမ်များကို ပြန်ပြုပျင်ရန်လေ့ ငွေကြေးအခက်ကြုံနီကတ်ရသည့်အပြင် အိမ်ဆောက်ပစ္စည်းများနန့် ကုန်စျီးနှုန်းများမှာ အဆမတန်မြင့်တက်နီခြင်းကြောင့် စစ်ဖီးယှောင်များကိုယ်ထူကိုယ်ထပြန်ဆောက်ရန်မဖြစ်နိုင်၍ သစ်၊ဝါးများနန့် အမိုးအကာများအရေးပေါ်လိုအပ်နီသည်ဟုဆိုသည်။
တိမ်ညိုစစ်ဖီးယှောင်စခန်းတွင် လူဦးရေ ၂၈၆၂ ယောက်ဟိပြီး နီအိမ်ပျက်စီးလား၍ဘုန်းကြီးကျောင်း၊ စာသင်ကျောင်း၊ ဆီးရုံနန့် နီးစပ်ရာနီအိမ်များ၌ ယာယီခိုလှုံနီရသူဦးရေ ၂၀၀၀ ကျော်ဟိကြောင်း သိရသည်။
Mocha ဆိုင်ကလုန်းမုန်တိုင်းတိုက်ခတ်မှုကြောင့် တိမ်ညိုစစ်ဖီးယှောင်စခန်းအပါအဝင် ရက္ခိုင်ပြည်မြို့နယ်အသီးသီးဟိ စစ်ဖီးယှောင်စခန်းများအားလုံးနီးပါး ပြိုပျက်လားခရပြီး စစ်ဖီးယှောင်အများစုမှာ နီးစပ်ရာနီရာများ၌ ယာယီ ခိုလှုံနီကတ်ရကာ စားနပ်ရိက္ခာ၊ သောက်သုံးရီ၊ အမိုးအကာ၊ ဆီးဝါးအပါအဝင် အရေးပေါ် အကူအညီများ အရေးကြီးလိုအပ်လျက်ဟိကြောင်း သိရသည်။
