APM ၊ စပ်တမ်ဘာ ၂၃ / ၂၀၂၃
ပေါက်တောမြို့နယ်၊ အလယ်ဖရုံကာကျွန်း၊ ဆင်တက်မော်ရွာဟောင်း (မူဆလင်ရွာ)မာ ဒေနိ(စပ်တမ်ဘာ ၂၃ ရက်နိ)နိခင်း ၃ နာရီကျော်က မီးလောင်မှုဖြစ်လို့ နီအိမ် ၁၀ ဆောင်နန့် ဆိုင်ခန်း ၅ ခန်း ပျက်စီးလားရေလို့ သိရပါရေ။
ဖြစ်စဉ်မာ ဒေနိ နိခင်း ၃ နာရီက ဆင်တက်မော်ရွာဟောင်း မူဆလင်ရွာ ဈီးဟောင်းပိုင်းမာဟိရေ ဝပ်ချော့ဆိုင်တခုမာ မီးစက်နှိုးလို့ ဝါတိန်ဆော်နီရေခါ မီးစလောင်ရေလို့ ဆိုပါရေ။
မီးလောင်မှုကြောင့် လူနန့် တိရစ္ဆာတိ တစုံတရာ ထိခိုက်ဒဏ်ရာမရဟိကေလေ့ လူနီအိမ် ၁၀ ဆောင်နန့် ကုန်ပစ္စည်းတိရောင်းရေ ဆိုင်ခန်း ၅ ခန်း ပျက်စီးဆုံးယှုံးလားပါရေ။
မီးလောင်မှုကိုတော့ညဇာ ၄ နာရီ ၁၅မိနစ်လောက်မာ မီးငြိမ်းသတ်နိုင်ခပြီးကေ ဖြစ်စဉ်အသေးစိတ်ကို သက်ဆိုင်ရာက စုံစမ်းစစ်ဆီးနီရေလို့ သိရပါရေ။
မီးလောင်လို့ နီအိမ်တိ ပျက်စီးလားရေ လူဦးရီ ၁၀၀ လောက်မာ လောလောစဉ် စားဝတ်နီရီး အခက်ကြုံနီရေလို့ ဆိုပါရေ။
ကုန်ခရေ မေ ၈ ရက်နိကလေ့ ကြိမ်နီပြင် IDP စခန်းမာ မီးလောင်လို့ လုံးချင်းအိမ် ၁၅၀ ၊ ၈ခန်းတွဲ ၃၅ဆောင် နန့် မင်းသာဖရွာက အိမ်ခြီ ၁၄၀ မီးလောင်ပြာကျလားခသိမ့်ကြောင်း သိရပါရေ။
