APM၊ စပ်တမ်ဘာ ၉/ ၂၀၂၃
မြောက်ကိုရီးယားဂေါင်းဆောင် ကင်ဂျုံအန်းရေ ဒေနိ(စပ်တမ်ဘာ ၉ရက်)နိမာ ကျရောက်တေ မြောက်ကိုရီးယား တည်ထောင်ခြင်း (၇၅) နှစ်မြောက် စိန်းရတု နှစ်ပတ်လည်နိ အခမ်းအနားကိုကျင်း ပပါရေ။
စိန်ရတုနှစ်ပတ်လည်နိ စစ်ရီးပြအခမ်း အနားသို့ တရုတ် နိုင်ငံရီးကိုယ်စားလှယ်အဖွဲ့တက်ရောက်ပိုင် ရုသျှအကအဖွဲ့လည်း တက်ရောက်ခပြီးကေ မြောက်ကိုရီးယားပြည်သူ သောင်းနန့်ချီလို့ တက်ရောက်ခကတ်ပါရေ။
အမေရိကန်နန့် တရုတ်အကြား ပြင်းထန်ရေ ထိပ်တိုက်တွိမှုတိဖြစ်နီချိန်အတွင်း တရုတ်၊ ရုသျှရို့နန့် ကောင်းမွန်ရေ ဆက်ဆံရီးကို ပြသလိုက်စွာလည်း ဖြစ်ပါရေ။
အခမ်းအနားကို မြို့တော်ပြုံယမ်းမာ စပ်တမ်ဘာ ၈ရက်နိ၊ ညဇာဖက်ကစလို့ စစ်ရီးပြအခမ်းအနားတိနန့် ဖွင့်လှစ်ခပြီး စစ်ရီးပြချီတက်ပွဲကိုတော့ အရံတပ်ဖွဲ့၊ ပြည်သူ့လုံခြုံရီးတပ်ဖွဲ့တိနန့် ဖော်ဆောင်ခပါရေ။
ဒေနှစ် စစ်ရီးပြပွဲမာ နျူကလီးယားလက်နက်တိကို ကိုင်တွယ်ဖို့ စစ်ဖက်ဆိုင်ရာတပ်ဖွဲ့တိထက် အရံတပ်တိ၊ ပြည်သူ့လုံခြုံရီး တပ်တိကို အဓိကပါဝင်ခပါရေ။
စစ်ရီးပြအတွင်း ပြည်သူ့စစ်တပ်ဖွဲ့ဝင်တိက တင့်ကားဖျက်ဒုံးပစ် လောင်ချာတိကို ပြသခပြီးကေ အခမ်းအနားသို့ တက်လာ ရေ ပြည်သူတိကလည်း ပြည်သူအားလုံး လက်နက်ကိုင်ထားရေလို့ ရွီးထားရေ စာရွက်တိကို ကိုင်ဆောင်ထားကတ်ပါရေ။
အခမ်းအနားသို့ တရုတ်နိုင်ငံက တရုတ်ဒုဝန်ကြီးချုပ်၊ ပေါ်လစ်ဗျူရိုအဖွဲ့ဝင် Liu Guozhong ဦးဆောင်ရေ ကိုယ်စားလှယ် အဖွဲ့ တက်ရောက်ခပြီးကေ အခမ်းအနားမစခင် ကင်ဂျုံအန်းနန့် နှစ်နိုင်ငံအကြား ဘက်စုံပူးပေါင်းဆောင်ရွက်ရီးကို ပိုလို့မြှင့်တင်ဖို့ ဆွေးနွေးခကတ်တေလို့ KCNA သတင်းက ဖော်ပြပါရေ။
ယင်းအပြင် ရုသျှသမ္မတပူတင်စွာ မြောက်ကိုရီးယားဂေါင်းဆောင်နန့် လာဖို့အပတ်လောက်မာ တွိဖို့ ပြင်ဆင်မှုတိလုပ်နီရေ လို့လည်း တောင်ကိုရီးယားနန့် အမေရိကန်ရို့က ခန့်မှန်းနီကတ်ပါရေ။
Source – Kim Jong Un hosts Chinese and Russian guests at a parade celebrating North Koreas 75th anniversary
Photo – KCNA
