APM ၊ ဧပြီ ၉/ ၂၀၂၄
အမ်းမြို့နယ်မာ ဒေနိ(ဧပြီ ၉ ရက်နိ)၊မိုးထပိုင်းက အကြမ်းဖက်စစ်ကောင်စီပစ်ခတ်လိုက်တေ လက်နက်ကြီးကျရောက် ပေါက်ကွဲလို့ အချေတယောက်သီဆုံးလားရေလို့ သိရပါရေ။
သီဆုံးလားရေ အချေစွာ အမ်းမြို့နယ်၊ ကြောင်ဖြူကွင်းရွာက မောင်နေထူးနိုင်(၁၀ နှစ်) ဖြစ်ပါရေ။
ဒေနိမိုးထ ၉ နာရီလောက်က အမ်းအခြီစိုက် အကြမ်းဖက်စစ်ကောင်စီတပ် ခမရ ( ၃၇၃) တပ်ရင်းကနီ ကြောင်ဖြူကွင်းရွာဖက်ကို လက်နက်ကြီးနန့်ပစ်ခတ်ရာလက်နက် ကြီးကျည်တလုံးစွာ ကြောင်ဖြူကွင်းရွာထဲသို့ကျရောက် ပေါက်ကွဲခပြီးကေ မောင်နေထူးနိုင်ကို လက်နက်ကြီးကျည်စမှန်ပနာ နီရာမာပင် ဂွင်းချင်းသီဆုံးလားရေလို့ ဒေသခံတိက ဆိုပါရေ။
ရက္ခိုင်ပြည်တဝန်းဟိ တပ်ရင်း၊ တပ်မဌာနချုပ်တိ၊ တပ်စခန်းတိ အမြောက်အမြားနန့်မြို့တိ တမြို့ပြီးတမြို့ လက်လွှတ်ဆုံးယှုံးနီရရေ စစ်ယှုံးစစ်ကောင်စီစွာ အပြစ်မဲ့ပြည်သူတိနီထိုင်ရေ မြို့၊ရပ်ရွာတိကို လက်နက်ကြီး၊ဒရုန်း၊ဂျက်တိုက်လီယာဉ်တိကိုအသုံးပြုပနာ ပစ်ခတ်မှုတိ နိစဉ်ရက်ဆက် ပြုလျက်ဟိပါရေ။
