APM၊ နိုဗမ်ဘာ ၉ /၂၀၂၃
မြောက်ဦးမြို့အတွင်း ဒေနိခါ လမ်းလားလမ်းလာ ဒေသခံပြည်သူတိကို စစ်ကောင်စီတပ်ဖွဲ့နန့် စစ်ကောင်စီလက်အောက်ခံ ရဲတပ်ဖွဲ့ဝင်တိပူးပေါင်းပနာ တင်းတင်းကျပ်ကျပ်စစ်ဆီးနီရေလို့ သိရပါရေ။
ဒေနိ မိုးထ ၈ နာရီလောက်က စစ်ကောင်စီတပ်ဖွဲ့ဝင်တိနန့် ရဲတပ်ဖွဲ့ဝင်တိရေ မြောက်ဦးမြို့၏ မြို့ဝင်လမ်းဖြစ်တေ ငွေတောင်ပေါက်တန်းတားနန့် ဗန္ဓုလတန်းတားကနီပနာ ခရီးလားပြည်သူတိ၏ ဆိုင်ကယ်တူးဘောက်တိကို ဖွင့်စစ်စွာ၊ မီးမြန်းစွာတိနန့် ဖုန်းတိကို စစ်ဆီးစွာတိ ပြုလုပ်နီရေလို့ ဒေသခံတိက ပြောပါရေ။
ယင်းပိုင် စစ်ဆီးမှုတိကြောင့် ခရီးလားပြည်သူတိမာ စိတ်မလုံခြုံမှု၊ စိုးရိမ်မှုတိနန့် လားလာနီကတ်ရပြီးကေ ခရီးကြန့်ကြာမှုတိနန့် အခက်ကြုံနီကတ်ရရေလို့ဆိုပါရေ။
ကုန်ခရေ အောက်တိုဘာ ၂၅ ရက်နိကစလို့ ကျောက်တော်မြို့ထဲမာ လည်း စစ်ကောင်စီတပ်ဖွဲ့ဝင်တိနန့် ရဲတပ်ဖွဲ့ဝင်တိ ပူးပေါင်းပြီးကေ လမ်းလားလမ်းလာတိကို စစ်ဆီးမူတိ ပြုလုပ်နီပါရေ။
အလားတူ ရသေ့တောင်မြို့နယ်အပါအဝင် ရက္ခိုင်က တခြားမြို့နယ်တိမာလည်း စစ်ကောင်စီစွာ ခရီးလားပြည်သူတိကို အချိန်ကြန့်ကြာအောင် ရပ်တန့်ထားခြင်း၊ တရားခံစစ်ပိုင်တယောက်ချင်းခေါ်ယူစစ်မိန်းခြင်း၊လူတိကို တန်းစီပနာ မှတ်ပုံတင်စစ်ခြင်း၊ ဖုန်းအပါအဝင်အသုံးအဆောင်ပစ္စည်းအားလုံးကို စစ်ဆီးခြင်း၊ ကား၊ ဆိုင်ကယ်တိကို လှန်လှောရှာဖွီ ခြင်းစရေ မဖွယ်မရာတိကို တစိုက်မတ်မတ်လုပ်ဆောင်နီပါရေ။
ရက္ခိုင်ပြည်မာ ကုန်ခရေ ၂၀၂၂ ခုနှစ်၊ နိုဗမ်ဘာ ၂၆ ရက်နိကစလို့ ရက္ခိုင့်တပ်တော် AA နန့် စစ်ကောင်စီတပ်ရို့ လူသားချင်းစာနာမှုဆိုင်ရာ အပစ်အခတ်ရပ်စဲခပြီး စစ်ဆီးရီးဂိတ်တိကို ဖွင့်ပီးခကေလေ့ ဒေဂုစစ်ကောင်စီတပ်တိစွာ ရက္ခိုင်ပြည်မြို့နယ်တိမာ စစ်ရီးလှုပ်ယှားမှုတိ ပိုလို့လုပ်ဆောင်လာနီရေအပြင် စစ်ဆီးရီးဂိတ်တိကိုလည်း တိုးချဲ့ဖွင့်လှစ်ပျာ စစ်ဆီးမှုတိ တင်းကျပ်လာနီရေလို့ သိဟိရပါရေ။
