APM၊ စပ်တမ်ဘာ ၈ / ၂၀၂၄
သံတွဲမြို့မာ စပ်တမ်ဘာ ၇ ရက်နိ၊ ညဇာက စစ်ကောင်စီ၏ လီကြောင်း ဗုံးကြဲတိုက်ခိုက်မှုကြောင့် အရပ်သားပြည်သူ ၅ ယောက် ထိခိုက် ဒဏ်ရာရဟိလားရေလို့ မြို့ခံတိက ပြောပါရေ။
ဒဏ်ရာရလားရေ လူတိကတော့ သံတွဲမြို့၊အမှတ်( ၇ ) ဗောဓိကုန်းရပ်ကွက်က အစ္စလာမ်ဘာသာဝင် ဗလီဆရာ ဦးမောင်ဆန်း (၆၀နှစ်)၊ ကိုမောင်ကောင်း(၂၆ နှစ်)၊ ကိုဇွဲသက်မာန် (၂၀ နှစ်)၊ မသိန်းသိန်းစိုး (၂၁ နှစ်)နန့် ဦးဇင်မောင်မောင် (၃၂ နှစ်)ရို့ဖြစ်ကတ်ပါရေ။
စပ်တမ်ဘာ ၇ ရက်နိ၊ ညဇာ ၇ နာရီ ၁၅ မိနစ်လောက်မာ စစ်ကောင်စီ၏ ဂျက်ဖိုက်တာ တစီးစွာ အမှတ် (၇ ) ဗောဓိကုန်းရပ်ကွက်ဟိ ရီအားလျှပ်စစ်စီမံကိန်း အပါးဟပ်စပ်ကို ဗုံးကြဲတိုက်ခိုက်ခစွာလို့ မျက်မြင် မြို့ခံ တယောက်က ပြောပါရေ။
“ဗောဓိကုန်းက ရီအားလျှပ်စစ် စီမံကိန်းနားကို လီယာဉ်နန့်လာပစ်ဟာ။ အနားကပင် ဟိန်းပါလားရေ။ အဆောင်တိလည်း နည်းနည်း ပြိုပါလားရေ။ ဒဏ်ရာရလူကတော့ ဗလီဆရာ တယောက်အပါအဝင် ၅ ယောက်ဟိပါရေ၊ ဗလီဆရာမာတော့ ဒဏ်ရာနည်းနည်းပြင်းပါရေ”
ယင်း ဗုံးကြဲတိုက်ခိုက်မှုကြောင့် ဗလီဆရာ ဦးမောင်ဆန်းမာ ပါးစပ်၊ ညာဖက်လိုင်ပင်း၊ ဘယ်ဖက်ပါး ရို့မာ ထိခိုက်ဒဏ်ရာ ရဟိလားရေပိုင် ကိုဇွဲသက်မာန်၊ ကိုမောင်ကောင်း၊ မသိန်းသိန်းစိုးနန့် ဦးဇင်မောင်မောင်ရို့မာလည်း ခြီသလုံး၊ပါး၊ ပခုံးနန့်နားအောက်ရို့မာ ဒဏ်ရာ ဒဏ်ရာအသီးသီး ရဟိလားရေလို့ ဆိုပါရေ။
ကုန်ခရေ စပ်တမ်ဘာ ၃ ရက်နိကလည်း သံတွဲမြို့နယ်နန့် အနားဟပ်စပ် ရပ်ရွာတိကို စစ်ကောင်စီက လီကြောင်း ဗုံးကြဲတိုက်ခိုက်မှု ပြုလုပ်ခလို့ ဆင်ခေါင်းရွာက ဘုန်းကြီးကျောင်းတိ ပျက်စီးလားရေပိုင် ဒေသခံ ပြည်သူ ၄ ယောက် ထိခိုက် ဒဏ်ရာ ရဟိလားခပါသိမ့်ရေ။
အာရက္ခဒေသအတွင်း စစ်စခန်းစကေချေရာကျန်ရေ စစ်ယှုံး စစ်ကောင်စီစွာ အာရက္ခတပ်တော်နန့်ရင်ဆိုင်တိုက်ပွဲတိမာလည်း လီကြောင်း ပစ်ခတ်တိုက်ခိုက်မှုတိကိုရာ အဓိကပြုလုပ်နီရေပိုင်၊ အရပ်သားပြည်သူလူထုကို ဦးတည်ပနာ လီကြောင်းက ဗုံးကြဲ တိုက်ခိုက်မှုတိ အယင်ကထက် ပိုလို့ လုပ်ဆောင်လျက်ဟိနီပါရေ။
