APM ၊ ဩဂတ်စ် ၈ /၂၀၂၃
လေးမြို့မြစ်ရီ မြင့်တက်လာနိုင်၍ မြောက်ဦးအပါအဝင် မြစ်ကမ်းတလျှောက် မြီနိမ့်ပိုင်းဒေသများ၌ နီထိုင်သည့်လူများ အထူး သတိပြုနီထိုင်ကတ်ရန် မိုးလီဝသနန့် ဇလဗေဒညွှန်ကြားမှုဦးစီးဌာနမှ ဒေနိ(ဩဂတ်စ် ၈ ရက်နိ) မိုးထ ၈ နာရီတွင် ထုတ်ပြန်သည်။
ထုတ်ပြန်ချက်၌ “ဒေနိ မြန်မာစံတော်ချိန် မိုးထ ၇ နာရီခွဲ အချိန်တိုင်းထွာချက်များအရ လေးမြို့မြစ်ရီသည် မြောက်ဦးမြို့တွင် ယင်းမြို့၏ စိုးရိမ်ရီမှတ်အောက် ၃ ပေခွဲလောက်တွင်ရောက်နီပါသည်။ အဆိုပါမြစ်ရီသည် နောက် ၁ ရက်အတွင်း ယင်းမြို့ ၏ စိုးရိမ်ရီမှတ်သို့ ရောက်လာနိုင်ပါသည်” ဟု ဆိုသည်။
ယင်းသို့ လေးမြို့မြစ်ရီမြင့်တက်လာနိုင်၍ မြောက်ဦးမြို့နယ်အပါအဝင် လေးမြို့မြစ်ကမ်းနားနန့် မြီနိမ့်ပိုင်းဒေသများတွင် နီထိုင်လူများအနီနန့် အထူး သတိပြုနီထိုင်ကတ်ရန်လေ့ မိုး/ဇလက အကြံပြုထားသည်။
လေးမြို့မြစ်ရီသည် လက်ဟိတွင်လေ့ တရိပ်ရိပ် မြင့်တက်လျက်ဟိပြီး မြောက်ဦး နန့် မင်းပြားမြို့ နယ်များမှ မြီနိမ့်ပိုင်း ကျေးရွာအများစုတွင် ရီကြီးမှု ဖြစ်ပွားလျက်ဟိပါသည်။
ရက္ခိုင်ပြည်တွင် ဂျူလိုင် ၃၁ ရက်နိမှလက်ဟိအချိန်ထိ မိုးအဆက်မပြတ် ရွာသွန်းနီကာ မြစ်၊ချောင်းရီများ မြင့်တက်လာမှု ကြောင့် ကျောက်တော်၊ မြောက်ဦး၊ မင်းပြား၊ တောင်ကုတ်၊ သံတွဲ၊ ပေါက်တော၊ဘူးသီးတောင်၊မောင်တောစသည့် မြို့နယ်များမှ ကျေးရွာတချို့တွင်လေ့ ရီကြီးမှုများဖြစ်ပေါ်လျက်ဟိသည်။
ယင်းအပြင် ပင်လယ်ရီတိုက်စားကာ ကမ်းထောင်းပြိုကျမှုများကြောင့် နီအိမ်များပျက်စီးခြင်းအပါအဝင် လူသီဆုံးများ ဟိ ကြောင်းလေ့ သိဟိရသည်။
Photo- မိုး/ဇလ
