APM ၊ သြဂတ်စ် ၈ / ၂၀၂၃
ကျောက်တော်မြို့နယ်၊ င/တရံစစ်ဖီးယှောင်းစခန်းတွင် ဩဂတ်စ် ၁ ရက်နိမှ လက်ဟိအချိန်အထိ မိုးအဆက်မပြတ်ရွာသွန်း၍ တောင်ကျရီများကြောင့် စခန်းတွင်းရီကြီးနီကြောင်း သိရသည်။
ယင်းစစ်ဖီးယှောင်စခန်းတွင် အိမ်ထောင်စု ၆၄ စုနန့် လူဦးရေ ၃၂၆ ယောက် ခိုလှုံနီထိုင်လျက်ဟိသည်။
မုန်တိုင်းအဟိန်ကြောင့် ဩဂတ်စ် ၁ ရက်နိမှ လက်ဟိအချိန်ထိ မိုးများအဆက်မပြတ်ရွာနီ၍ တောင်ကျရီများ စခန်းတွင်းသို့ ဝင်ရောက်ကာ ရီအမြင့်ပေ ၈ ပေ ကျော်အထိမြင့်တက်နီ၍ တောင်ကုန်းဟိ ဇရပ်သို့ပြောင်းရွှိနီထိုင်နီကတ်ကြောင်း စစ်ဖီးယှောင်များက ပြောသည်။
ယင်းအပြင် ကျောက်တော်မြို့နယ်က မြို့မရွှီကျောင်း၊ကဝိရတနာ၊နီပူခံ၊COC၊မြို့သစ်မှန်ကျောင်း၊သိမ်ပြင်ကျောင်း၊သရက်အုပ်၊ ညောင်ချောင်း စစ်ဖီးယှောင်စခန်းရို့မှာလေ့ မိုးကြီး၍ စခန်းတွင်းရီကြီးနီကာ စစ်ဖီးယှောင်များ ဖီးလွတ်ရာသို့ ရွှိပြောင်းနီကတ်ရကြောင်းသိရသည်။
ရက္ခိုင်တွင် ပြီးခသည့် ၂ လကျော်က တိုက်ခတ်ခသည့် Mocha ဆိုင်ကလုန်းမုန်တိုင်းကြောင့် စစ်ဖီးယှောင်စခန်းများမှ စစ်ဖီးယှောင်များမှာ ဆိုးဆိုးဝါးဝါးထိခိုက်နစ်နာခရပြီး ၊တချို့စခန်းများမှာ လက်ဟိအချိန်ထိ အမိုးအကာအောက်သို့ ရောက်ရန် ခက်ခဲနီတုန်းဖြစ်ကာ ဒေဂု နောက်ထပ်ရီကြီးမှုများကြောင့်လေ့ ပို၍အခက်ကြုံနီကတ်ရသည်။
