APM ၊ ဂျုန် ၈ / ၂၀၂၃
ဘင်္ဂလားပင်လယ်အော်အရှိမြောက်ပိုင်းနန့် ဘင်္ဂလားပင်လယ်အော် အရှိ အလယ်ပိုင်းတွင် ဖြစ်ပေါ်နီသည့် လီဖိအားနည်း ဆဲလ်ကြောင့် ရက္ခိုင်ပြည်တွင်းရီကြောင်း လိုင်းတခုဖြစ်သည့် ရွှီပြည်တန် အမြန်ရီယာဉ်၏ ရီကြောင်းခရီးစဉ်တချို့ကို နက် ဖြန်(ဂျုန် ၉ ရက်နိ)မှစကာ တပတ်လောက် ယာယီရပ်နားလားမည်ဖြစ်ကြောင်း သိရသည်။
ဘင်္ဂလားပင်လယ်အော်အရှိမြောက်ပိုင်းနန့် ယင်းနန့်ဆက်စပ်လျက်ဟိသော ဘင်္ဂလားပင်လယ်အော် အရှိအလယ်ပိုင်းရို့တွင် လီဖိအားနည်းဆဲလ်တခုဖြစ်ပေါ်နီပြီယင်းလီဖိအားဆဲလ်အဟိန်ကြောင့် ဒေရက်ပိုင်းအတွင်း ရက္ခိုင်တွင် မိုးသည်းထန်စွာ ရွာ သွန်းခြင်း၊ လီပြင်းတိုက်ခတ်ခြင်း၊ ရုတ်တရက် ရီကြီးခြင်းနန့် မြီပြိုခြင်းများ ဖြစ်ပေါ်နိုင်ကြောင်း မိုးလီဝသန့် ဇလဗေဒဦးစီး ဌာနက ထုတ်ပြန်ထားသည်။
ယင်းကြောင့် ရက္ခိုင်ပြည်တွင်း ရီကြောင်းလိုင်းတလုဖြစ်သည့် ရွှီပြည်တန်အမြန်ရီယာဉ်၏ စစ်တွေ – ကျောက်ဖြူ – ရမ်းဗြဲ – ကျောက်နီမော် – တောင်ကုတ်နန့် တောင်ကုတ် – မာန်အောင် ဗြီးဆွဲနီသည့်ရီကြောင်းခရီစဉ်များကို နက်ဖြန်မှစကာ တပတ် လောက်ရပ်နားထားမည်ဟု ရွှီပြည်တန်အမြန်ရီယာဉ်လိုင်း၏တာဝန်ဟိသူတယောက်က ပြောသည်။
အဓိက ကတော့ ဒီရက်ပိုင်းမှာ လီပွီလှိုင်းတခုဝင်လာနိုင်ရေလို့ မိုးဇလကထုန်ပြန်ထားရေအတွက် ဒေခရီးစဉ်တိကို ရပ်ထားဖို့ စွာပါ။ဇာလောက် ကြာဖို့ကို အတိအကျမပြောနိုင်သိမ့်ကေလေ့ အနည်းဆုံးတပတ်လောက်တော့ ကြာနိုင်ပါရေ။ ကျန်ရေ လိုင်းတိကတော့ အခြေအနီကြည့်ပြီးကေ ပုံမှန်ဗြီးဆွဲလားပါဖို့ ဟုဆိုသည်။
ဒေနိ(ဂျုန် ၈ ရက်နိ) ညဇာကပင် လီတိုက်နှုန်း တနာရီလျှင် ၅၈ မိုင်နှုန်းနန့် အပူပိုင်း ဆိုင်ကလုန်းမုန်တိုင်း(Tropical Cyclone – TC) သည် မြေပုံမြို့နားက ဖြတ်ကျော်ဝင်ရောက်တိုက်ခတ်မည်ဟု မိုးလီဝသပညာသျှင်များက ခန့်မှန်းထားသည်။
ယင်းမုန်တိုင်းသည်ဂျုန် ၉ ရက်နိညပိုင်းတွင် စစ်တွေမြို့အနောက် မြောက်ဖက် မိုင် ၄၀ ခန့်၊ ရက္ခိုင်-ဘင်္ဂလားဒေ့ချ် နယ်စပ် အနား ရက္ခိုင်ကမ်းရိုးတန်း မြောက်ပိုင်းကမ်းခြီကို ဖြတ်ကျော်ဝင်ရောက်မည်ဟု ဆိုသည်။
မိုးလီဝသနန့်ဇလဗေဒဦးစီးဌာနကလေ့ ဘင်္ဂလားပင်လယ်အော်အရှိမြောက်ပိုင်းနန့် ဘင်္ဂလားပင်လယ်အော် အရှိအလယ် ပိုင်းရို့တွင် ဖြစ်ပေါ်နီသည့်လီဖိအားနည်းဆဲလ်အဟိန်ကြောင့်ရက္ခိုင်ကမ်းရိုးတန်းနန့် ကမ်း လွန်ပင်လယ်ပြင်ရို့တွင် မိုးသက် လီပြင်း ကျရောက်ပြီး မိုးသက်လီပြင်းကျစဉ် ရီပြင်/မြီပြင်လီသည် တနာရီလျှင် မိုင် ၄၀ အထိ တိုက်ခတ်နိုင်ကြောင်း ထုတ် ပြန်ထားသည်။
