APM ၊ မေ ၇ /၂၀၂၄
ကျောက်ဖြူမြို့နယ်မာ ဒေနိ(မေ ၇ ရက်နိ)၊မိုးထက အကြမ်းဖက်စစ်ကောင်စီတပ်ထောင်ထားရေ မိုင်းကို နင်းမိလို့ ဒေသခံတယောက် ခြီတဖက်ပြတ်ထွက်လားရေလို့ သိရပါရေ။
ခြီတဖက်ပြတ်ထွက်လားရေလူစွာ ကျောက်ဖြူမြို့နယ်၊ ဂုံးချွိန်တိုက်နယ်၊ အုန်းတောရွာ၊ ကုန်ဘောင်ထောင့်က ဦးထွန်းနိုင်(ခ) ကောက်ချေ( ၄၅ နှစ်) ဖြစ်ပါရေ။
ဦးထွန်းနိုင်စွာ ဒေနိ၊ မိုးထ ၈ နာရီခွဲလောက်က ကျောက်ဖြူတောင် အနားတဝိုက်မာ တယောက်တည်း ဝါးခွတ်ဖို့လားရာ ကျောက်ဖြူတောင် ဘုရားကုန်း၊ တောလမ်းအလယ်တည့်တည်မာ အကြမ်းဖက်စစ်ကောင်စီတပ်ထောင်ထားရေ မိုင်းကို နင်းမိလို့ ပေါက်ကွဲမှုဖြစ်ခကြောင်း ဒေသခံတိက ပြောပါရေ။
ယင်းမိုင်းပေါက်ကွဲမှုကြောင့် ဦးထွန်းနိုင်၏ ဘယ်ဖက်ခြီထောက်စွာ ဒူးဆစ်အောက်ကနီ ပြတ်ထွက်လားခရေပိုင်၊ ခန္ဓာကိုယ်အနှံ့မာလည်း ဒဏ်ရာပြင်းပြင်းထန်ထန်ရလားရေလို့ ဆိုပါရေ။
လက်ဟိမာ ဦးထွန်းနိုင်စွာ အရေးပေါ် ဆီးကုသမှုခံယူလျက်ဟိရေလို့ သိရပါရေ။
