APM၊ ဂျန်နဝါရီ ၇ / ၂၀၂၃
ဂျန်နဝါရီ ၆ ရက်နိ၊ ညဇာ ၉ နာရီလောက်မာ ရက္ခိုင်ပြည်၊ ကျောက်တော်မြို့နယ်ဟိ စစ်ကောင်စီ၏ အမာခံ တောင်ရှည် တောင်ဗျူဟာကုန်းကြီးတခုလုံးက စစ်ကောင်စီတပ်ဖွဲ့ဝင်အားလုံး တယောက်ချေတောင်မကျန် ရက္ခိုင့်တပ်တော် AA ထံမာ လက်နက်ချအညံ့ခံလိုက်ကတ်ယာဖြစ်ကြောင်း ညီနောင်မဟာမိတ် (၃) ဖွဲ့က ဂျန်နဝါရီ ၆ ရက်နိ ယှင်းလင်းပြတ်သားစွာ ထုတ်ပြန်လိုက်ပါရေ။
ညီနောင်(၃)ဖွဲ့၏ သတင်းထုတ်ပြန်ချက် အတွင်း “၂၀၂၄ ခုနှစ်၊ ဂျန်နဝါရီလ(၆) ရက်၊ ညဇာ(၉) နာရီခန့်အချိန်တွင် ရက္ခိုင်ပြည်၊ တောင်ရှည်တောင် ဗျူဟာကုန်းကြီးတခုလုံးမှ တယောက်မကျန် မိမိရို့ထံလက်နက်ချအညံ့ခံခပြီးဖြစ် သည် လို့ ထည့်သွင်းဖော်ပြထားပါရေ။
တဆက်တည်းမာ ရက္ခိုင်ဒေသအတွင်း ရက္ခိုင့်တပ်တော်က လက်ဟိထိုးစစ်ဆင်နီရေ ဗျူဟာကုန်းတိက ဂေါင်းဆောင်တိ အနီနန့် ရက္ခိုင့်တပ်တော်၏ စေတနာမှန်ကို နားလည်ပြီးကေ အယင်ဆုံး ဆုံးဖြတ် ချက်ချပနာ လက်နက်ချ အညံ့ခံကတ်ဖို့ ညီနောင် (၃) ဖွဲ့က ထပ်မံသတိပီးထားပါရေ။
“ပြည်သူ့ရင်ခွင်ကို စောစောခိုလှုံကေ မိသားစု၊ဆွီမျိုး၊ညီအစ်ကို မောင်နှမတိ နန့် စောစော တွိရဖို့”၊ “စောစော လက် နက်ချ အညံ့ခံကေ နက်ဖြန်ခါ အသက်ရှင်ကျန်ခဖို့” လို့ ညီနောင်သုံးဖော်က စာနာမှုအပြည့်နန့် အကြံပြုထားပါရေ။
“အသက်ကိုဉာဏ်စောင့်” ဆိုကေလေ့ စစ်ကောင်စီတပ်ဖွဲ့တိုင်း၏ အသက်စွာ ညီနောင်မဟာမိတ်ရို့အပေါ်မာ အဓိကမူတည်နီ စွာကို ၁၀၂၇ စစ်ဆင်ရီးကာလအတွင်း အရေးနိမ့်ပြီးကေ ထွက်ဗြီးကတ်တေလူတိ၊ စစ်ယှုံးဒဏ်အရသာကိုမြည်း စမ်းဖူး ကတ်တေလူတိ ကောင်းစွာသိရေလို့လည်း ဆိုပါရေ။
လက်ဟိအချိန်မာ လက်နက်ချအညံ့ခံရေလူ အရေအတွက်စွာ ၃၀၀၀ ကျော် ၄၀၀၀ နီးပါးအထိဟိလာကြောင်းလည်း ညီနောင်မဟာမိတ် (၃) ဖွဲ့၏ ထုတ်ပြန်ချက်မာ ဖော်ပြထားပါရေ။
