APM ၊ စပ်တမ်ဘာ ၆ / ၂၀၂၃
လူသားချင်းစာနာမှုအကူအညီလိုအပ်သည့် ကမ္ဘာ့နိုင်ငံ ၁၄နိုင်ငံအတွက် အမေရိကန်ဒေါ်လာ ၁၂၅ သန်းကို ခွဲဝီပီးမည်ဖြစ် ကြောင်း ကုလသမဂ္ဂ လူသားချင်းစာနာထောက်ထားမှုညှိနှိုင်းရီးရုံး (OCHA)က စပ်တမ်ဘာ ၅ ရက်နိတွင် ထုတ်ပြန်သည်။
အာဖဂန်နစ္စတန်နန့် ယီမင်နိုင်ငံရို့က တနိုင်ငံစီ ဒေါ်လာ သန်း ၂၀ စီရဟိမည်ဖြစ်ပြီး မြန်မာပြည်နန့် ဘာကီနာဖာဆိုရို့က ဒေါ်လာ ၉ သန်းစီရဟိမည်ဖြစ်ကာ မာလီ၊ ဟေတီနန့် ဗင်နီဇွဲလားရို့က တနိုင်ငံလျှင် ဒေါ်လာ ၈ သန်းစီရမည်ဖြစ်ကြောင်း ထုတ်ပြန်ချက် တွင် ဖော်ပြထားသည်။
အလားတူ ဗဟိုအာဖရိကသမ္မတနိုင်ငံနန့် မိုဇမ်ဘစ် နိုင်ငံရို့အတွက် ကန်ဒေါ်လာ ၆ ဒသမ ၅ သန်း၊ ကင်မရွန်းနန့် ပါလက်စတိုင်း အတွက် ဒေါ်လာ ၆ သန်းနန့် မာလာဝီနိုင်ငံရို့ကို ဒေါ်လာ ၄ သန်းစီ ထောက်ပံ့ပီးမည်ဟု ဆိုသည်။
ယင်းအပြင် အဆိုပါ ရန်ပုံငွေသည် ဘင်္ဂလားဒေ့ချ်နိုင်ငံဟိ မူဆလင်ဒုက္ခသည်အတွက် ဒေါ်လာ ၈သန်းနန့် ယူဂန်ဒါ နိုင်ငံဟိ ဒုက္ခသည်များအတွက် ဒေါ်လာ ၆ သန်း ပံ့ပိုးပီးမည်ဖြစ်ကြောင်း သိရသည်။
ဒေဂုနှစ်တွင် ကမ္ဘာတဝန်း ပဋိပက္ခ၊ ရာသီဥတုထိခိုက်မှု၊ သဘာဝဖီးအန္တရာယ်များ၊ ရောဂါဖြစ်ပွားမှု၊ အိုးမဲ့အိမ်မဲ့ဖြစ်မှုနန့် တခြား အကျပ်အတည်းများကြောင့် ထိခိုက်ခံစားရလူ သန်း ၂၅၀ ဟိကြောင်း ကုလသမဂ္ဂက ဆိုသည်။
အဆိုပါ လူပေါင်း သန်း ၂၅၀ ကို ကူညီရန် ရန်ပုံငွေ အမေရိကန်ဒေါ်လာ ၅၅ဘီလီယံကျော် လိုအပ်ကြောင်း ကုလသမဂ္ဂက အယူခံ ဝင်ခကေလေ့ လက်ဟိအချိန်အထိ လိုအပ်သည့်ရန်ပုံငွေ၏ ၃၀ရာခိုင်းနှုန်းအောက် ဒေါ်လာ ၁၆ ဘီလီယံလောက် ရာရသိမ့်သည်ဟု သိဟိရသည်။
Source – UN releases $125 million for 14 underfunded humanitarian crises around the world
Photo – AP
