
APM ၊ ဧပြီ ၆ / ၂၀၂၃
ဘရာဇီးနိုင်ငံ၊ ဆန်တာ့ ကတ်တာရိနာပြည်နယ်တောင်ပိုင်း၊ ဘလူးမန်နောင်မြို့တွင် ဧပြီ ၅ ရက်နိက အချေစောင့်ယှောက်ရီး ဂေဟာတခုကို ပေါက်ဆိန်ကိုင်ဆောင်ထားသည့် လူတယောက် ဝင်ရောက်တိုက်ခိုက်၍ အချေ ၄ ယောက်သီဆုံးကာ၊ ၄ ယောက် ထိခိုက် ဒဏ်ရာရဟိလားကြောင်း သိရသည်။
တိုက်ခိုက်ခံရသည့် နီရာမှာ Cantinho Bom Pastor အချေစောင့်ယှောက်ရီးဂေဟာဖြစ်ပြီး တိုက်ခိုက်ခံရမှုအတွင်း အသက် ၅ နှစ်မှ ၇ နှစ်ကြား ယောက်ျားချေ ၃ ယောက်နန့် မမာ့ချေ ၁ ယောက်သီဆုံးခခြင်းဖြစ်ကြောင်း ဒေသခံရဲများက ဆိုသည်။
ပြစ်မှုကျူးလွန်သူသည် မှုခင်းဖြစ်ပွားခသည့်ဂေဟာ အားကဇတ်ကွင်းထဲကို ဝင်ရောက်ကာ အချေများကို တိုက်ခိုက် ခခြင်းဖြစ်ပြီး၊ တိုက်ခိုက်မှုဖြစ်နီစဉ် ဆရာ၊ ဆရာမများ ရောက်လာသဖြင့် ထွက်ဗြီးသည်ဟု ဆိုသည်။
ဖြစ်စဉ်အတွင်း ပြစ်မှုကျူးလွန်ခသည်ဟု သံသယဟိသူ အသက် ၂၅ နှစ်အရွယ် အမျိုးသား ၁ ယောက်ကို ဖမ်းဆီး ထားကြောင်း ဆန်တာ့ ကတ်တာရိနာ ပြည်နယ်အုပ်ချုပ်ရီးမှူး ဂျော်ဂျင်ဟိုမီလိုက တွစ်တာတွင် ပြောကြားခသည်။
အဆိုပါဖြစ်စဉ်အတွက် သမ္မတ လူလာဒါ ဆေးလ်ဗားကလေ့ ဝမ်းနည်းကြောင်းနန့် ယင်းကဲ့သို့ သူရဲဘောကြောင်သည့် လုပ်ရပ်ကို ရှုတ်ချကြောင်းပြောကြားခကာ၊ အပြစ်ကင်းပြီး၊ အကာအကွယ်မဲ့သည့် အချေသူငယ်များကို အကြမ်းဖက် တိုက်ခိုက်သည့် လုပ်ရပ်လောက် နာကျင်ရသည့် ဖြစ်ရပ်မဟိကြောင်း ၎င်း၏ တွစ်တာတွင် ရွီးသားခသည်။
Source – Four children killed in ax attack at day care center in southern Brazil
Photo – EPA
