APM၊ ဖေဖော်ဝါရီ ၆ / ၂၀၂၅
မောင်တောမြို့နယ်၊ ရွှီဇားဂုံးနား(မူဆလင်)ရွာမာ ဒေနိ(ဖေဖော်ဝါရီ ၆ ရက်နိ)၊ ညဇာ ၃ နာရီ ၄၀ မိနစ်ကလည်း အကြမ်းဖက် ဖက်ဆစ် စစ်ကောင်စီတပ် ထောင်ထားခရေ စစ်ကျန်မိုင်း တလုံးကို နင်းမိရာက ပေါက်ကွဲမှုဖြစ်ပနာ ဒေသခံ ၃ ယောက် ဒဏ်ရာပြင်းပြင်းထန်ထန် ရလားရေလို့ သိရပါရေ။
ဒဏ်ရာရလားလူတိစွာ ရွှီဇားဂုံးနား(မူဆလင်)ရွာက အဖ ဒိလ်မာမတ်၏သမီး နူရ်ကိုင်ဒါ(၃၀နှစ်)၊ သူ၏ မောင်ဖြစ်သူ ကျော်မြင့်နိုင်(ခ) မာမတ်ဆော်လိမ်နန့် အဖ အေနာဇူလ်ဟောက်၏ သမီး ရှာဟဲအာတာ(၂ နှစ်) ရို့ဖြစ်ကတ်ပါရေ။
ဒေနိ၊ ညဇာ ၃ နာရီ ၄၀ မိနစ်လောက်မာ နူရ်ကိုင်ဒါစွာ သူ့၏အိမ်နောက်ဖက်သို့ ရီခပ်ဖို့လားရေခါ အိမ်နောက်ဖက်ထွက်ဝမာ အကြမ်းဖက် ဖက်ဆစ် စစ်ကောင်စီတပ် ထောင်ထားခရေ မိုင်းကိုနင်းမိခရေလို့ ရွာသားတယောက်က ပြောပါရေ။
ယင်းမိုင်းပေါက်ကွဲမှုကြောင့် နူရ်ကိုင်ဒါ၏ ညာဖက် ခြီပြတ်ထွက်လားပြီးကေ၊ ယင်းအနားမာဟိရေ ကျော်မြင့်နိုင်(ခ)မာမတ်ဆော်လိမ်နန့် ရှာဟဲအာတာမာလည်း မိုင်းစထိမှန်ဒဏ်ရာ အသီးသီး ရလားကတ်တေလို့ ဆိုပါရေ။
ဖေဖော်ဝါရီ ၅ ရက်နိကလည်း ရွှီဇားဂုံးနားရွာမာ အိမ်ထက်ကနီ အိမ်အောက်သို့ ဆင်းချိန် အယင်က အကြမ်းဖက် ဖက်ဆစ် စစ်ကောင်စီတပ် ထောင်ထားခရေ စစ်ကျန်မိုင်းတလုံးကို တက်နင်းမိလို့ ပေါက်ကွဲမှုဖြစ်ပနာ အဖနိူရ်ရူလောက်၏သား မာမတ်ဂျူနိုက်၏ ခြီတဖက်ပြတ်ထွက်လားခပါသိမ့်ရေ။
Photo- Arakan Princess Media
