APM ၊ ဂျန်နဝါရီ ၆ / ၂၀၂၄
ကျောက်တော်မြို့နယ်တွင် ဒေနိဂျန်နဝါရီ ၆ ရက်နိ၊နိခင်းက ဟင်းရှာလားရေ ဒေသခံ အမျိုးသမီးတယောက် မိုင်းနင်းမိလို့ ပေါက်ကွဲပနာ ခြီထောက်တဖက်ပြတ်ထွက်လားကြောင်း သတင်းရဟိပါရေ။
မိုင်းဒဏ်ကြောင့်ခြီထောက်တဖက်ပြတ်လားခရေ အမျိုး သမီးစွာ ကျောက်တော်မြို့နယ်၊ညောင်ပင်လှရွာက ဒေါ်မကျော်သိန်း (၅၉ နှစ်) ဖြစ်ပါရေ။
ဒေါ်မကျော်သိန်းစွာ လမ်းမတော်အုပ်စု၊ ၊သကြားစက်၏ အရှိတောင်ဖက်ဟိ အာထည့်တောင်မာ ဟင်းလားရှာရာက မိုင်းနင်းမိပြီး ပေါက်ကွဲမှုဖြစ်ပနာ ညာဖက်ခြီထောက်ပြတ်ထွက်လားခရရေလို့ ဒေသခံတိက ပြောပါရေ။
မိုင်းပေါက်ကွဲမှုကြောင့် ဒေါ်မကျော်သိန်းမာ ညာဖက်ခြီထောက် ဒူးဆစ်အောက်က ပြတ်ထွက်လားပြီးကေ ဘယ်ခြီထောက်နန့်ခန္ဓာကိုယ်အနံ့မာလည်း ဒဏ်ရာ ပြင်းပြင်းထန်ထန်ရဟိလားရေအတွက် ကျောက်တော်ပြည်သူ့ဆီးရုံသို့ အရေးပေါ်ပို့ဆောင်လိုက်ရကြောင်း သိရပါရေ။
မိုင်းပေါက်တေ အားထည့်တောင်ကနီ စစ်ကောင်စီတပ်၏ စကခ (၉) တပ်မအခြီချရာတောင်ကုန်းကို ယှင်းလင်းစွာ မြင်ရပြီး စကခ(၉) နန့်ယင်းတောင်စွာ တမိုင်နီးပါးရာကွာဝီးကြောင်း ဒေသခံတိက ဆိုပါရေ။
စကခ (၉) တပ်မက တပ်ဖွဲ့ဝင် ၂၀ လောက်စွာလည်း ဂျန်နဝါရီ ၄ရက်နိ မိုးထ၉နာရီလောက်က အာထည့်တောင်သို့ ထူးခြားစွာတက်လားခသိမ့်ကြောင်းလည်း သိဟိရပါရေ။
