APM ၊ ဩဂတ်စ် ၅/ ၂၀၂၄
မောင်တောမြို့နယ်မာ စစ်ကောင်စီတပ် ထောင်ထားခရေမိုင်းကို ဩဂတ်စ် ၃ ရက်နိ၊ ညဇာ ၅ နာရီကျော်လောက်က တက်နင်းမိလို့ စစ်ဖီးယှောင် ပြည်သူတယောက် ခြီထောက်တဖက်ပြတ်ထွက်လားရေလို့ ဒေသခံတိက ပြောပါရေ။
ခြီထောက်တဖက် ပြတ်ထွက်လားခရေလူစွာ မောင်တောမြို့နယ်၊ ရွာသာယာရွာကနီ ကံပြင်သာစည်ရွာသို့ လာရောက် စစ်ဖီးယှောင်နီရေ ဦးအောင်လှိုင် (၄၅ နှစ်) ဖြစ်ပါရေ။
ဦးအောင်လှိုင်စွာ ဩဂတ်စ် ၃ ရက်နိ၊ ညဇာ ၅ နာရီကျော်လောက်မာ သူစစ်ဖီးယှောင်နီရေ ကံပြင်သာစည်ရွာ မြောက်ဖက်အနားဟိ တောနားသို့ ဟင်းခူးလားလို့ အပြန်၊ ယင်းအနားမာ အယင်က စစ်ကောင်စီတပ်ထောင်ထားခရေ မိုင်းကို တက်နင်းမိပနာ ပေါက်ကွဲမှု ဖြစ်ခစွာ လို့ ဒေသခံတိက ဆိုပါရေ။
ယင်းသို့ပေါက်ကွဲမှုကြောင့် ဦးအောင်လှိုင်၏ ဘယ်ခြီထောက်ပြတ်ထွက်လားရေပိုင် ခန္ဓာကိုယ်အနှံ့မာလည်း မိုင်းစကျပနာ ဒဏ်ရာရလားပါရေ။
မောင်တော အပါအဝင် ရက္ခိုင်ပြည် မြို့နယ်ရို့မာ မိုင်းပေါက်ကွဲမှုကြောင့် အရပ်သားပြည်သူရို့ သီဆုံးမှု၊ ထိခိုက်ဒဏ်ရာမှုတိ မကြာမကြာဖြစ်ပွားလို့ဟိနီပါရေ။
မိုင်းပေါက်ကွဲမှုတိစွာ အယင်က စစ်ကောင်စီတပ် တပ်စွဲနီ ထိုင်ခရေနီရာတိနန့် အယင်ကစစ်ကောင်စီတပ် စစ်ရီးလှုပ်ယှားမှုတိပြုလုပ်ခရေ နီရာတိမာ နွားကျောင်းနီလို့ ဖြစ်စီ၊ လယ်ထွန်နီလို့ဖြစ်စီ၊ ဟင်းရှာ၊ ထင်းခွတ်စသဖြင့် လားလို့ဖြစ်စီ ဖြစ်လိဖြစ်ထဟိပါရေ။
ရက္ခိုင်အမျိုးသားအဖွဲ့ချုပ်/ အာရက္ခတပ်တော် (ULA/AA) ကတော့ ယင်းပိုင် မိုင်းအပါအဝင်စစ်ကျန်လက်နက်တိ ပေါက်ကွဲမှုနန့်ပတ်သက်လို့ ပြည်သူရို့ကို ထိရောက်တေ နည်းလမ်းတိနန့် လက်တွိကျကျ အသိပညာပီးဟောပြောစွာ၊ မိုင်းအပါအဝင်စစ်ကျန်လက်နက်အန္တရာယ် အသိပီးစာရွက်၊ စာတန်း၊ အမှတ်အသားတိပြုလုပ်စွာရို့လုပ်ဆောင်လို့ဟိနီပြီးကေ၊ ပြည်သူရို့ကလေ့ တိတိကျကျလိုက်နာကတ်ဖို့ အထူးသတိပီးတိုက်တွန်းထားပါရေ။
