APM၊ ဂျူလိုင် ၅/ ၂၀၂၃
ဂျော်ဒန်မြစ်အနောက်ဖက်ကမ်းဟိ ဂျနင်ပါလက်စတိုင်းဒုက္ခသည်စခန်းကို ဂျူလိုင် ၃ရက်နိကစ၍ အစ္စရေးစစ်တပ်က စစ် ဆင်ရီးပြုလုပ်ခရာ ဂျူလိုင် ၄ ရက်နိတွင် စစ်ဆင်ရီးကို ပြန်ရုတ်သိမ်းခပြီး စစ်ဆင်ရီးအတွင်း သီဆုံးသည့် ပါလက်စတိုင်း ၁၂ ယောက် ဟိခကြောင်း သိရသည်။
အစ္စရေးဝန်ကြီးချုပ် ဘင်ဂျမင်နေတန်ယာဟုက ဂျနင်မြို့အနီးဟိ စစ်အခြီစိုက်စခန်းတခုတွင် စစ်ဆင်ရီးပြီးမြောက်လား ကြောင်း ကြေညာခပြီး လိုအပ်လျှင်နောက်ထပ်စစ်ဆင်ရီးပြုလုပ်လားမည်ဖြစ်ကြောင်း သတိပီးပြောကြားခသည်။
စစ်ဆင်ရီးအတွင်း ပါလက်စတိုင်းဖက်မှ လက်နက်ကိုင်တပ်ဖွဲ့ဝင် ၅ ယောက်အပါအဝင် စုစုပေါင်း ၁၂ ယောက်သီဆုံးခကာ လူ ပေါင်း ၁၀၀လောက် ထိခိုက်ဒဏ်ရာရဟိခကြောင်း ပါလက်စတိုင်းကျန်းမာရီးဌာနမှ ထုတ်ပြန်ပြီး ဂျနင်မြို့မှ ပြန်လည် ဆုတ်ခွာစဉ် အစ္စရေးစစ်သားတယောက်သီဆုံးခကြောင်း အစ္စရေးစစ်တပ်က ဆိုသည်။
ဒုက္ခသည်စခန်းကိုစီးနင်းမှုအတွင်း ဗလီ တခု အောက်ဟိ လိုဏ်ခေါင်းတခုအတွင်းမှ ဖောက်ခွဲရီးပစ္စည်းများကို သိမ်းဆည်းရ မိခပြီး လက်နက် ၁၀၀၀ လောက်နန့် သံသယဟိသူ ၃၀ လောက်ကို ဖမ်းဆီးခကြောင်းလေ့ အစ္စရေးစစ်တပ်က ပြောကြား သည်။
စစ်ဆင်ရီးကို တုံ့ပြန်သည့်အနီနန့် ဂျူလိုင် ၄ရက်နိတွင် အစ္စရေး၏ စီးပွားရီးအချက်အချာကျသည့် Tel Aviv ဒေသတွင် ပါလက်စတိုင်း ဟားမတ်စ်လက်နက်ကိုင်အဖွဲ့က ကားဖြင့်ဝင်တိုက်မှုဖြစ်ပွားရာ အစ္စရေး ၈ ယောက်ထိခိုက်ဒဏ်ရာရ ဟိခကြောင်း အစ္စရေး အာဏာပိုင်များက ဆိုသည်။
အလားတူ စစ်ဆင်ရီးပြီးနောက် ဂါဇာကမ်းမြောင်ဒေသဟိ ပါလက်စတိုင်းလက်နက်ကိုင်များက အစ္စရေးဖက်သို့ ဒုံးကျဉ်ငါးစင်း ပစ်ခတ်ခကြောင်းသိရသည်။
စစ်ဆင်ရီးအတွင်း ဒုက္ခသည်စခန်းမှ ၃၀၀၀ လောက်ကို ဖီးလွတ်ရာသို့ ရွိပြီးပီးခရပြီးအဆောက်အအုံတချို့လေ့ ပျက်စီးခရကာ လျှပ်စစ်မီးနန့် ရီးပီးဝီမှု ပြတ်တောက်လားကြောင်း သိဟိရသည်။
Source – Israeli forces begin withdrawal from Jenin as rockets fired from Gaza
Photo – AFP
