APM၊ ဂျုန် ၅/၂၀၂၂
ရက္ခိုင်အမျိုးသားအဖွဲ့ချုပ်/ ရက္ခိုင့်တပ်တော်(ULA/AA) ဦးဆောင်သည့် “ရက္ခိုင်ပြည်သူ့အစိုးရ”၏ တတိယအကြိမ်မြောက် သတင်းစာယှင်းလင်းပွဲကို လာမည့် ဂျုန် ၁၄ ရက် (အင်္ဂါနိ) မိုးထ ၁၀နာရီတွင် ကျင်းပပြုလုပ်လားမည်ဖြစ် ပါကြောင်း ULA/AA ပြန်ကြားရီးတာဝန်ခံ ဆရာဦးခိုင်သုခ၏ လူမှုကွန်ရက်စာမျက်နှာမှာ ဒေနိခါ ရွီးသားကြေညာထားပါသည်။
ယင်းကြေညာချက်အရ ဒေဂုတတိယအကြိမ်မြောက် သတင်းစာယှင်းလင်းပွဲတွင်လေ့ အယင်သတင်းစာယှင်းလင်းပွဲများနည်းတူ “ရက္ခိုင်ဘာသာစကားဖြင့်သာ” ပြောဆိုယှင်းလင်းလားမည်ဖြစ်ပြီး၊ သတင်းစာယှင်းလင်းပွဲသို့ တက်ရောက်လိုသည့် သတင်းသမားများအနီနန့် (https://forms.gle/9VtAioBVDp4oCuET6) လင့်တွင် ဦးစွာဝင်ရောက် စာရင်းသွင်းရမည် ဖြစ်ပြီး၊ စာရင်းသွင်းထားခြင်း မဟိပါက၊ တက်ရောက်ခွင့်မပြုဟု ဆိုသည်။
သတင်းစာယှင်းလင်းပွဲအတွင်း သတင်းသမားတယောက်ကို မိန်းခွန်း(၂)ခုနန့် ထပ်ဆင့်မိန်းခွန်း (၁) ခုကိုရာ လက်ခံဖြေကြားပီးမည်ဖြစ်ပြီး၊ သတင်းသမားများအနီနန့်လေ့ မိန်းမြန်းလိုသည့်မိန်းခွန်း(၂)ခုကို ဂျုန် ၁၀ ရက်နိ နောက်ဆုံး ထား၍ (press.ula.aa@protonmail.com)သို့ အီးမေးလ်ပီးပို့လျက် မိန်းထားရမည် ဖြစ်သည်။
ယင်းအပြင် သတင်းစာယှင်းလင်းပွဲသို့ သတ်မှတ်ရက်ကျော်လွန်ပြီးမှ ရောက်ဟိလာသော မိန်းခွန်းများကို ပြန်လည် ဖြေကြားမည်မဟုတ်ဘဲ၊ နောက်ထပ်သတင်းစာယှင်းလင်းပွဲများမှာရာ ထပ်မံမိန်းမြန်းနိုင်သည်ဟုဖော်ပြထားသည်။
ကုန်ခသည့် မေလအတွင်းက ထူးခြားသည့် အကြောင်းအရာများမဟိ၍ သတင်းစာယှင်းလင်းပွဲ မလုပ်ခခြင်းဖြစ်ပြီး အေဂုလမှာ ၂လစာ တပေါင်းတည်း ပြုလုပ်လားမည်ဟုလေ့ ဆရာဦးခိုင်သုခ၏ လူမှုကွန်ရက်စာမျက်နှာမှာ ဖော်ပြထားဟိပါသည်။
