APM ၊ မေ ၇ / ၂၀၂၃
မြန်မာစစ်တပ်ဖမ်းဆီးထားပြီး မတရားအသင်းဆက်သွယ်မှုဥပဒေပုဒ် ၁၇(၁) နန့်တရားစွဲခံထားရသည့် ကျောက်ဖြူဒေသခံ ၄ ယောက်ကို မေ ၅ ရက်နိ၌ (၂၁)ကြိမ်မြောက်ရုံးထုတ်ခပြီး ဒေတကြိမ်ရုံးချိန်းမှာတော့ မြန်မာစစ်တပ်ဖက်က တရားလို တယောက်ရောက်ဟိလာကြောင်း သိရသည်
ရက္ခိုင့်တပ်တော်AAနန့် မြန်မာစစ်တပ်ရို့ တိုက်ပွဲကာလများအတွင်း၌ ကျောက်ဖြူမြို့နယ်တွင် မြန်မာစစ်တပ်က မတရား သဖြင့် ဖမ်းဆီးခသည့် အပြစ်မဲ့ပြည်သူ ၆၀ ကျော်ခန့်ဟိပြီး ယင်းအထဲက ၁၇(၁)နန့်တရားစွဲခံထားသည့် ကျောက်ဖြူမြို့၊ စေတီတောင်ရပ်ကွက်မှ ရပ်ကွက်အုပ်ချုပ်ရီးမှူး ဦးဝင်းမောင်အပါအဝင် ၄ ယောက်ကို ရုံးထုတ်ခခြင်း ဖြစ်သည်။
ယင်းသို့ ရုံးထုတ်ရာ၌ အယင်ရုံးချိန်းများကတကြိမ်တခါမျှလာရောက်ခြင်းမဟိခသည့် မြန်မာစစ်တပ်ဖက်က တရားလို ဗိုလ် ကြီး ရှိုင်းထက်အောင်ဆိုသူ ပထမဆုံးအကြိမ်ရောက်ဟိလာ၍အမှုနန့်သက်ဆိုင်သည့် အကြောင်းအရာတချို့ကို စစ်ဆီးနိုင်ခ ကြောင်း သိရသည်။
ယင်းကျောက်ဖြူဒေသခံ ၁၄ ယောက်အား တရားစွဲဆိုထားသည့် တရားလိုများမှာ မြန်မာစစ်တပ်ဖက်မှ ဗိုလ်ကြီး ရှိုင်းထက် အောင် နန့် ဗိုလ်အဆင့်ဟိသူတယောက် ဖြစ်သည်။
၎င်းတရားလိုနှစ်ယောက်သည်စတင်ရုံးထုတ်သည့်အချိန်မှ အကြိမ်(၂၀)မြောက်အထိ တကြိမ်တခါမျှ ရုံးချိန်းလာရောက်ခြင်း မဟိဘဲ ဒေဂု(၂၁) ကြိမ်မြောက် ရုံးချိန်းတွင်ရာ ဗိုလ်ကြီးရှိုင်းထက်အောင်ဆိုသူ ပထမဆုံးအကြိမ်ရုံးချိန်းလာရောက်ခြင်းဖြစ် ကာ ကျန်ဗိုလ်အဆင့်ဟိသူတယောက်ကတော့ လက်ဟိအချိန်ထိ ရုံးချိန်းလာရောက်ခြင်းမဟိသိမ့်ဟုသိရသည်။
အလားတူ ကျောက်ဖြူဒေသခံများအပါအဝင် တခြားရက္ခိုင်ပြည်မြို့နယ်အသီးသီးမှ မြန် မာစစ်တပ်ဖမ်းဆီးတရားစွဲခံထားရ သူများ၏အမှုများတွင်လေ့တရားလိုဖက်က ရုံးချိန်းပျက်ကွက်နီ၍ ကြန့်ကြာနီကတ်ရသည့် အမှုပေါင်းမြောက်များ စွာဟိနီ သည်။
ယင်းသို့ တရားလိုဖက်မှ ရုံးချိန်းပျက်ကွက်နီ၍ စွပ်စွဲခံရသူအမှုသည်များတွင် ရုံးချိန်းလားရသည့် စရိတ်စခအပါအဝင် နစ်နာ မှုများစွာဟိနီကာအမှုကိုအယင်စစ်ဆီးပြီးအပြစ်ဟိကပြစ်ဒဏ်ချ၊ အပြစ်မဟိက အယင်ဆုံး ပြန်လွှတ်ပီးစီချင်ကြောင်း စွပ်စွဲ ခံရသူများ၏ မိသားစုဝင်များက တောင်းဆိုနီကတ်သည်။
