APM၊ နိုဗမ်ဘာ ၅/ ၂၀၂၃
၁၀၂၇ စစ်ဆင်ရီးအဖြစ် ဒေနိ(နိုဗမ်ဘာ ၅ ရက်နိ)၊ မိုးထပိုင်းမာပင် စစ်ကောင်စီတပ်စခန်း (၂) ခုကို တအာင်းတပ်မတော် (TNLA) က ထပ်မံ တိုက်ခိုက်သိမ်းပိုက်လိုက်ကြောင်း ထုတ်ပြန်ပါရေ။
တအာင်းပြည်နယ်၊ တပ်မဟာ (၃)စစ်ဒေသ၊ နမ့်ခမ်းမြို့နယ်၊ မိုင်းဝီးကျေးရွာအုပ်စုဟိ စစ်ကောင်စီ၏ မန်ဝင်တပ်စခန်းကို ဒေနိမိုးထ ၆ နာရီလောက်မာ TNLA က တိုက်ခိုက်သိမ်းပိုက်ခရေလို့ ဆိုပါရေ။
အလားတူ တပ်မဟာ(၄) စစ်ဒေသ၊ နမ္မတူမြို့နယ်၊ ပန်သပြေကျေးရွာဟိ စစ်ကောင်စီတပ်စခန်းကိုလည်း ဒေနိ မိုးထ ၆ နာရီလောက်မာ TNLA က ဝင်ရောက်တိုက်ခိုက်သိမ်းပိုက်ခပါရေ။
ဒေနိမိုးထ ၅ နာရီလောက်က တပ်မဟာ(၄) စစ်ဒေသ၊ လားသျှိုးနန့် သိန္နီကြား (၁၄ မိုင် နန့် ၁၅မိုင်)ကြားဟိ နမ့်တွန်ကျေးရွာမာ စစ်ကား (၄)စီးနန့် စစ်ကူရောက်လာရေ စစ်ကောင်စီတပ်ကို TNLA က ဖြတ်တိုက်ခပြီးကေ စစ်ကား (၄) စီး၊ သီနတ် (၂) လက်နန့် တခြားစစ်အသုံးဆောင်ပစ္စည်းတိ သိမ်းဆည်းရမိရေလို့ သိဟိရပါရေ။
