APM ၊ အောက်တိုဘာ ၅ / ၂၀၂၃
မြေပုံမြို့နယ်၊ ကမ်းထောင်းကြီး စစ်ဖီးယှောင်စခန်းက ကျောင်းသား / ကျောင်းသူတချို့စွာ ပညာဆက်လက်သင်ကြားနိုင်ဖို့ ငွေကြေးအခက်အခဲနန့် ရင်ဆိုင်နီကတ်ရရေလို့ သိရပါရေ။
ယင်းကမ်းထောင်းကြီးစစ်ဖီးယှောင်စခန်းမာ မူလတန်းကျောင်းသား / ကျောင်းသူ ၈၅ ယောက်၊ အလယ်တန်းကျောင်းသား / ကျောင်းသူ ၄၆ ယောက်၊ အထက်တန်းကျောင်းသား / ကျောင်းသူ ၁၃ ယောက်နန့် တက္ကသိုလ်တက်နီရေကျောင်းသား / ကျောင်းသူ ၇ ယောက်ဟိပါရေ။
ယင်းအထဲက အထက်တန်းနန့်တက္ကသိုလ်တက်နီကတ်တေ ကျောင်းသား / ကျောင်းသူအများစုမာ ပညာဆက်သင်ဖို့ ငွေကြေးအခက်အခဲဖြစ်နီကတ်ရပနာ ကျောင်းထွက်ပြီးကေ မြို့ထက်က ဆိုင်ခန်းတိမာ အလုပ်ဝင်လုပ်နီကတ်ရပါရေ။
တချို့ကျောင်းသား / ကျောင်းသူတိဆိုကေ ကြုံရာကျဘမ်းအလုပ်တိဝင်လုပ်ပနာ ပညာဆက်သင်ဖို့ ငွေကြေး စုဆောင်းနီကတ်ရရေလို့ ဆိုပါရေ။
ယေကေလည်း အလုပ်အကိုင်ယှားပါးမှု၊ ကုန်စျီးနှုန်းတိအဆမတန်ထိုးတက်မှုတိကြောင့်ကျောင်းသား / ကျောင်းသူတိမာ လုပ်အားခနန့် မိသားစုစားဝတ်နီရီးကို ဖြေယှင်းနီကတ်ရလို့ ပညာရီးအတွက် ထိခိုက်နီကတ်ရရေလို့ သိရပါရေ။
ယင်းအပြင် စခန်းဟိ တချို့အချေတိမာလည်း အသက်အငယ်ချေနန့် ကျောင်းကထွက်လိုက်ရရေလူတိဟိရေပိုင် တချို့လည်း တက္ကသိုလ်ရောက်ခါမှ ငွေကြေးမတတ်နိုင်လို့ ကျောင်းနားလိုက်ရရေ လူတိဟိနီပါရေ။
ကမ်းထောင်းကြီး စစ်ဖီးယှောင်စခန်းမာ အိမ်ထောင်စု ၂ဝ၂ စုနန့် လူဦးရေ ၆၈၂ ယောက် ခိုလှုံနီရေလို့ သိဟိရပါရေ။
