APM၊အောက်တိုဘာ ၅ / ၂၀၂၃
ဒေနိ အောက်တိုဘာ ၅ ရက် မိုးထ ၄ နာရီလောက်ကစလို့စစ်တွေမြို့မာ စစ်ကောင်စီ ဖြိုသတ်ပစ်တေ စားသောက်ဆိုင် တိအပါအဝင် ဆိုင်ပေါင်း ၂၀ လောက်က အခြီခံဆိုင်ဝန်ထမ်းတိစွာ အလုပ်လက်မဲ့ဖြစ်လားခပြီးကေ စားဝတ်နီရီး အခက်အခဲတိကို ဆိုးဆိုးဝါးဝါးရင်ဆိုင်လာရနိုင်ရေလို့ ဆိုင်ဝန်ထမ်းတချို့က ပြောပါရေ။
ဒေနိ ဖြိုဖျက်ခံလိုက်ရရေဆိုင်တိကတော့ The Corner၊ နိုင်ဂြီး၊ Global၊ Family၊ Sevenသုံးလုံး၊ သန်းကျော်ဌေး၊ ဒေါ်ခင်လှရီ၊ Kသုံးလုံး၊ ဦးလှဖုန်းဆိုင်၊ဒေါ်ဘုချေဆိုင် အပါအဝင် ဆိုင်ပေါင်း ၂၀ လောက် ဖြိုဖျက်ခံလိုက်ရပြီးကေ အများစုမာ စားသောက်ဆိုင်တိဖြစ်ပါရေ။
ဖြိုဖျက်ခံလိုက်ရရေဆိုင်၂၀ ဝန်းကျင် အထဲ စားသောက်ဆိုင် ဆိုင် ၁၆ ဆိုင်က ဝန်ထမ်းတိစွာ အောက်တိုဘာ ၇ ရက်က ၁၃ ရက်အတွင်း ဆန္ဒထုတ်ဖော်လားဖို့ စစ်ကောင်စီ ရဲတပ်ဖွဲ့မှူးရုံးမာ ဒေနိခါစာရွီးတင်ပြ တောင်းဆိုထားပါရေ။
လက်ဟိ ယင်းဆိုင်တိက အခြီခံဆိုင်ဝန်ထမ်းတိစွာ အလုပ်လက်မဲ့ဖြစ်နီ ပြီးကေ ယင်းဝန်ထမ်းမိသားစုတိမာလည်း စားဝတ်နီရီး အခက်အခဲနန့် ရင်ဆိုင်နီရရေလို့သိရပါရေ။
ဒေနိမိုးထကစလို့ စစ်ကောင်စီ၏ ရဲ၊ စည်ပင်နန့် တခြားအဖွဲ့အစည်းတိပူးပေါင်းအင်အား ၂၀၀ ကျော်လောက်နန့် စစ်တွေမြို့ စံပြရွာ အနောက်ဖက် ဟိုတယ်ကမ်းခြီပတ်လမ်းတလျှောက်ဆိုင်တန်းတိကို ဖြိုဖျက်ခကတ်စွာဖြစ်ပါရေ။
ဖြိုဖျက်ခံရရေ ဆိုင်ခန်းတိမာ ကုန်ခရေ ၂၀၁၂ -၂၀၁၃ သမ္မတ ဦးသိန်းစိန်လက်ထက်ကပင် မြို့နယ်စည်ပင်က အခွန်ကောက်ခံပနာ ဆိုင်နီရာတိချပီးခစွာလို့ သိဟိရပါရေ။
