APM၊ ဂျန်နဝါရီ ၅ /၂၀၂၄
စစ်တွေမြို့နယ်၊ချီလိုင်ဖင်းရွာမာ ဂျန်နဝါရီ ၂ရက်နိ၊မိုးထ အကြမ်းဖက် စစ်ကောင်စီတပ်က သီနတ်နန့် လိုက်ပစ်လို့ ဗြီးလွှားကတ်ရာက ရီမြုပ်ပျောက်ဆုံးနီရေ ကျောင်းဆရာ ၏ ရုပ်အလောင်းကို ညဇာက ပြန်တွိယာလို့ ဒေသခံတိက ပြောပါရေ။
အကြမ်းဖက်စစ်ကောင်စီ၏ ယမ်းကားပစ်ခတ်မှုတိကြား က လွတ်ကင်းရာသို့ ဗြီးလွှားယှောင်တိမ်းယင်း ရီမြုပ်သီ ဆုံးခရရေ ရွာကျောင်းဆရာကတော့ ကိုဇွဲနိုင်ဝင်း(၂၃နှစ်) ဖြစ်ပါရေ။
ဂျန်နဝါရီ ၂ ရက်နိ၊မိုးထ ၁၀ နာရီလောက်က စစ်ကောင်စီတပ်သား ၈၀ လောက်စွာ စစ်တွေမြို့နယ်၊ ချီလိုင်ဖင်းရွာသို့ စစ်ကြောင်းထိုးဝင်လာပြီးကေ ချီလိုင်ဖင်းရွာက အိမ်တဆောင်ကို ဖြိုဖျက်ပနာ၊ရွာထဲသို့ သီနတ်တိနန့် လူမဆန်စွာ ယမ်းကား ပစ်ခတ်ခကတ်ပါရေ။
အကြမ်းဖက်စစ်ကောင်စီတပ်က လက်နက်အားကိုးပနာရွာလမ်းမကြီးအတိုင်း သီနတ်နန့် လှမ်းပစ်တေခါ ရပ်သူ ရွာသားတိစွာ ဖီးလွတ်ရာသို့ အသက်လု ထွက်ဗြီးခ ကတ်ရပါရေ။
ယင်းအထဲ ဆရာဇွဲနိုင်ဝင်းလည်းပါပြီးကေ၊ အကြမ်းဖက် လူယမ်းကားရို့၏သီနတ်ကျည်ဆံကြားမာ ခြီဦးတည့်ရာ အသက်လုဗြီးလွှားယင်း ရွာနောက်က ချောင်းကို လောင်းမပါဘဲ ဖြတ်ကူးရေခါ ဆရာဇွဲနိုင်ဝင်း တယောက် ရီမြုပ်ပျောက် ဆုံးလားခပါရေ။
ယင်းပိုင်နန့် တရက်ကြာပြီးနောက် ဂျန်နဝါရီ ၄ ရက်နိ၊ ည ဇာ ၃ နာရီလောက်ရောက်တေခါ တရွာလုံးကချစ်ခင်လေး စားရရေ ဆရာဇွဲနိုင်ဝင်း၏ အသက်ကင်းမဲ့နီရေ ရုပ်ခန္ဓာကို သူမြုပ်လားခရေ နီရာနားတဝိုက်မာ ပြန်တွိခကတ်ရပါရေ။
ဆရာ၏ နောက်ဆုံးခရီးနန့်ပတ်သက်လို့ သူ၏သက်မဲ့ရုပ်အလောင်းကိုညဇာကပင် သင်္ဂြိုလ်ပြီးစီးကြောင်း၊ တပည့် တိနန့်တကွ အားလုံး ဝမ်းနည်း ကြီကွဲ ပူဆွေးနီကတ်ရကြောင်း ရွာသားတယောက်က ပြောပါရေ။
၂၀၂၃ ခုနှစ်၊ ဒီဇမ်ဘာ ၄ ရက်နိကလည်း တိုက်ပွဲဖြစ်ပွားစွာ လုံးဝ မဟိရေ ချီလိုင်ဖင်းရွာထဲကို အကြမ်းဖက်စစ်ကောင်စီ တပ်က ဝင်ရောက်ယမ်းကားပစ်ခတ်ရာ ကိုရင် တပါးအပါအဝင် ၄ ယောက်ထက်မနည်း ဒဏ်ရာရလားခသိမ့်ကြောင်း သိဟိရပါရေ။
Photo– CJ
